مەرجی سوپا بۆ جووتیارانی کورد: دان بە زێدەڕۆیی دا بنێن، ئینجا دروێنە بکەن

 

 

فیرقەی 8ـی سوپای عێراق، واژۆکردنی بەڵێننامەی دەستهەڵگرتن لە زەوییەکانیان کردووەتە مەرجی دەستپێکردنی دروێنەی گەنمەشامیی 1400 دۆنم زەوی لە گوندی گورزەیی. زەوییەکە دوای راگواستنی کورد لە ناوچەکە لەسەر ناوی کورد لابراوە و پێشکێش بە عەرەبێکی هاوردە بەناوی 'مونیف حەواس' کراوە.

 

رێگرییەکان دوێنێ شەممە سەریان هەڵدایەوە. ئیبراهیم نەسرەدین، یەکێک لە جووتیارانی گوندەکە بە  هەردی محەممەد، پەیامنێری رووداوی گوت: "بەڵێننامەکە پڕ ناکەینەوە، ئەگەر وابکەین، واتا دان بەوەدا دەنێین کە خاوەنی زەوییەکە نین. ئەمە زەوی باوباپیرانمانە و تاپۆی رەشمان هەیە."

 

جووتیاران دەڵێن، تاپۆکانمان دەگەڕێتەوە بۆ پێش ساڵانی 1970. سەلمان گورزەیی، موختاری گوندەکەیە، لە بەرنامەی بەرپرسیاری تۆڕی میدیایی رووداو گوتی، جگە لەوەی بەرهەمی ئەمساڵیان بەهۆی بارانەوە رووبەڕووی لەنێوچوون بووەتەوە، رێگرییان لێدەکرێت زەوییەکانیان بۆ وەرزی نوێی چاندن بکێڵن.

 

لەبارەی رەتکردنەوەی بەڵێننامەکە، موختاری گورزەیی گوتی، تاپۆیان هەیە و واژۆکردنەکە واتای دەستبەردابوون لە زەوییەکان دێت.

 

نوێنەرانی جووتیاران بە ئامادەبوونی بەڕێوەبەری ناحیەی پردێ، ئەمڕۆ یەکشەممە لە گەڵ فەرماندەی فیرقەی هەشتی سوپا کۆبوونەوە.

 

موتەلیب نەجمەدین، بەڕێوەبەری ناحیەی پردێ، لە بەرپرسیار گوتی: "بەڵێننامەیەک ئامادەکرابوو، کە خوێندنمانەوە جێگەی قبووڵ نەبوو. سوپاش ناچار بە واژۆکردنی جووتیارانی نەکرد. سوپا داوایکرد لە رێگەی دادگە چارەی کێشەکە بکرێت و گوتیان، لە سەرووی خۆمانەوە هاتووە و فەرمانە. بۆ چارەسەریی کێشەکە قسەم لەگەڵ پارێزگاری کەرکووک کرد و بە بەردەوامی لەسەر هێلە و رووداوەکانی رۆژم پێ راگەیاند. لە چەند رۆژی داهاتوو پارێزگار لە بەغدا دەگەڕێتەوە و لەگەڵ جووتیاران کۆدەبێتەوە. پارێزگار گوتی، شێوازی بەڵێننامەکە دەگۆڕین و لە جێگەی سوپا خۆم دەستوەردانی دۆخەکە دەکەم و چارەسەری دەکەم."

 

 

بە گوتەی بەڕێوەبەری ناحیەی پردێ، ئێستا تەنیا 6 جووتیاری گورزەیی ماون دروێنەی بەرهەمی گەنمەشامی بکەن.

 

ئەندامێکی ئەنجوومەنی پارێزگای کەرکووک، بنەڕەتی کێشەکە بۆ 50 ساڵ پێش ئێستا دەگەڕێنێتەوە و کێشەی گوندی گورزەیی بە 'جیاواز' ناودەبات.

 

عەبدوڵڵا میروەیس، لە بەرپرسیار، گوتی: " بە بڕیاری ئەنجوومەنی باڵای شۆرشی بەعس ئەو زەوییە دراوەتە کەسێکی عەرەب. لە 17-2-2025 یاسای ژمارە سێ کە لە پەرلەمانی عێراق دەرچووە دەبێ جێبەجێ بکرێ و چارەسەریی کێشەکە دەکات. رێنمایی جێبەجێکردنی یاساکە چووەتە ئەنجوومەنی شورای دەوڵەت و تاوەکو ئێستا هیچ دەنگوباسێکی نییە."

 

 

بەپێی بەڵگەنامەیەک کە دەست تۆڕی میدیایی رووداو کەوتووە، رژێمی بەعس لە 23ی ئابی 1977 بە بڕیارێکی "ئەنجوومەنی باڵای شۆڕش"، ئەم زەوییانە و سەدان دۆنم زەوی دیکەی لە کورد زەوتکردووە. زەویی گوندی گورزەییش بەناوی عەرەبێکی هاوردەی خەڵکی موسڵەوە تۆمار کراوە.