رووداو دیجیتاڵ
لە شارۆچکەی ئەردیش سەر بە پارێزگای وانی باکووری کوردستان حەوت کەس بە تۆمەتی کوژرانی دوو برا، خرانە زیندانەوە.
ئەو دوو برایە بە ناوەکانی موسا و محەممەد دەمیر رۆژی شەممە شەشی ئەیلوولی 2025 لە شەقامی رێگەی وان لە شارۆچکەی ئەردیش، کاتێک لە بەردەم کافێیەکەی خۆیان و لەنێو ئۆتۆمبێلدا بوون، رووبەڕووی هێرشێکی چەکداری بوونەوە و هەردووکیان کوژران.
دواتر ئاشکرا بوو ئەو دوو برایە لەلایەن چەند کەسێکەوە بە هەڵە کوژراون کە ویستوویانە تۆڵەی باوکی کوژراویان بکەنەوە. هێرشکارەکان ئۆتۆمبێلەکەیان لێتێکچووە و بە هەڵە هێرشیان کردووەتە سەر ئەو دوو برایە.
داواکاری گشتیی ئەردیش دەستی بە لێکۆڵینەوە کرد و دوای سەیرکردنەوەی کامێراکانی چاودێری، حەوت کەس دەستبەسەر کران و رەوانەی دادگەی ئەردیش کران.
دادگەی ئەردیش بە تۆمەتی "کوشتنی بە ئەنقەست" بڕیاری زیندانیکردنی بۆ حەوت کەسەکە دەرکرد و رەوانەی گرتووخانەی کردن.
داواکاری گشتیی ئەردیش رایگەیاند: "کارکردن بۆ دەستنیشانکردن و دەستگیرکردنی گومانلێکراوانی دیکە بەردەوامە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ