رووداو دیجیتاڵ
بەهۆی هاتووچۆی رۆژانەی بەڕێوەبەر و بەرپرسانی کەرتی نەوت و گاز و پترۆکیمیایی ئیلام، دانیشتووانی ئەو پارێزگایە تکتی فڕۆکەیان دەستناکەوێت.
بەپێی ئەو زانیارییانەی لە ئیلامەوە بە تۆڕی میدیایی رووداو گەیشتوون، دانیشتووانی ئەو پارێزگایە تکتی گەشتی ئاسمانییان دەستناکەوێت و هەموو تکتەکان بۆ بەڕێوەبەر و بەرپرسانی کەرتی نەوت و گاز و پترۆکیمیایی ئەو پارێزگایە تەرخان دەکرێن.
هاونیشتمانییەک لە ئیلام بە تۆڕی میدیایی رووداوی راگەیاند، رۆژانە یەک یان دوو گەشتی ئاسمانی لەنێوان ئیلام و تاران دەکرێن، بەڵام بەهۆی ئەوەی کۆمپانیاکانی فڕۆکەوانی گرێبەستیان لەگەڵ کەرتەکانی نەوت و گاز و پترۆکیمیایی ئیلام کردووە، تاوەکو رۆژانە بەرپرس و بەڕێوەبەرانیان لەنێوان ئیلام و تاران بگوازنەوە، خەڵکی ئاسایی زۆر بە سەختی تکتیان دەستدەکەوێت.
ئەو هاونیشتمانییە دەڵێت، کەسانێک کە کاری خێرا و بەپەلەیان هەیە یان نەخۆشن، پێویستی زیاتریان بەوە هەیە بە فڕۆکە هاتووچۆ بکەن، بەڵام تکتیان دەستناکەوێت و ناچار دەبن بە ئۆتۆمبێل هاتووچۆ بکەن. مەودای نێوان ئیلام و تاران نزیکەی 670 کیلۆمەترە و بە ئۆتۆمبێل زیاتر لە 7 کاژێر دەخایەنێت.
فەرەیدوون هیمەتی، پەرلەمانتاری ئیلام بوونی کێشەی هاتووچۆی ئاسمانی لە نێوان ئیلام و تاران پشتڕاستدەکاتەوە و لە کۆبوونەوەیەکدا لەگەڵ بەڕێوەبەری گشتیی کۆمپانیای فڕۆکەوانیی ماهانی ئێران، داوایکردووە ئەو کۆمپانیایە هێڵێکی تایبەت بۆ ئیلام تەرخان بکات و فڕۆکەکانی هەفتانە چەند گەشت لەنێوان ئیلام و تاران بکەن.
کۆمپانیای ماهان زستانی رابردوو گەشتەکانی لە فڕۆکەخانەی ئیلام راگرت. حەسەن بەهرامنیا، پارێزگاری ئیلام رۆژی دووشەممەی ئەم هەفتەیە رایگەیاند، بڕیارە ئەو کۆمپانیایە گەشتەکانی دەستپێبکاتەوە و رۆژانی پێنجشەممە گەشتێک لەنێوان ئیلام و تاران بکات.
بەپێی راپۆرتی پارێزگاری ئیلام، هەفتانە 22 گەشتی ئاسمانی لەنێوان فڕۆکەخانەکانی ئیلام و تاران و ئیلام و مەشهەد دەکرێن، بەڵام دانیشتووانی پارێزگاکە دەڵێن، رۆژانە یەک یان دوو گەشت دەکرێن و بەشی زۆری تکتی ئەو گەشتانەش پێشوەختە بۆ بەرپرس و بەڕێوەبەرانی پترۆکیمیایی ئیلام دەگیرێن.
نزیکەی 14٪ـی کۆی یەدەگی نەوت و گازی ئێران لە پارێزگای ئیلامە. لەو پارێزگایە چەند کۆمەڵگەی پیشەسازیی پترۆکیمیایی چالاکن و لە گەورەترینیان کە پترۆکیمایی ئیلامە، زیاتر لە دوو هەزار کەس تیێدا کار دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ