مەکتەبی سیاسیی پارتی: بڕیارماندا رەئی بە پەسندكردنی بودجە بدرێت

 

 

ئەمڕۆ یەکشەممە، 11-06-2023، مەکتەبی سیاسیی پارتی دیموکراتی کوردستان راگەیێندراوێکی لەبارەی پەسندکردنی بڕگەکانی پڕۆژەیاسای بودجە بڵاوکردەوە و تێیدا هاتووە، "پارتی لە روانگەی هەستكردن بە بەرپرسیاریەتی بەرامبەر بە ژیان و بژێویی هاووڵاتییانی كوردستان هەوڵی زۆریدا كە ماددە و بڕگەكانی یاسای بودجەی ساڵی 2023ـی عێراقی فیدراڵ بەگوێرەی ئیستحقاقاتی دەستووری و رێكکەوتنی ئیدارەی دەوڵەت بۆ پێكهێنانی كابینە و رێكکەوتنی حكومەتی هەرێمی کوردستان و حكومەتی فیدراڵ بێت و شایستە داراییەكان بۆ حكومەتی هەرێمی کوردستان دابین بكرێت."

 

لە راگەیێندراوەکەی مەکتەبی سیاسیی پارتیدا هاتووە، لەلایەكی دیكەوە زۆر بەجیدی هەوڵیانداوە "ئەو پیلانەی کە بەشێوەیەکی رێکخراو لە ئارادا بوون بۆ دەستوەردان لە سەروەری هەرێمی کوردستان و بچووككردنەوە و لێكترازانی قەوارەی هەرێمی کوردستان و كەمكردنەوەی دەسەڵاتەكانی كە لە دەستووردا جێگیركراون، پووچەڵبكاتەوە."

 

ئەو بڕگەیەی کە لە مادەی 14دا بە دڵی یەکێتی پەسند کرا و پارتی لێی ناڕازییە، دەڵێت: حکومەتی هەرێمی کوردستان پابەند دەبێت بە پێدانی ئەولەویەت بۆ دابەشکردنی مووچەی فەرمانبەران و خانەنشینانی هەرێمی کوردستان، هەروەها خەرجکردنی شایستەی وەبەرهێنانی پارێزگاکان بەپێی بنەماکانی ئەم یاسایە، بەپێچەوانەی ئەوە، لەسەر سەرۆکوەزیرانی حکومەتی فیدراڵە رێکاری پێویست بگرێتەبەر بۆ جێبەجێکردنی، لەنێویاندا "تەمویلکردن" واتە پارە راستەوخۆ بداتە پارێزگاکان.

 

دوای پەسندکردنی مادەی 14ـی بودجە، بڕگەی 8ـی ئەو مادەیە ناکۆکی لێکەوتەوە و پارتی رایگەیاند، یەکێتی "بە تاکڕەوی و دژی هەموو حیزبە کوردستانییەکان وەستانەوە" بۆ ئەوەی پارێزگای سلێمانی لە پارێزگاکانی دیکە جیابکەنەوە، ئەوەش "پێچەوانەی دەستوورە." دەشڵێت: ئەو بیرۆکەیەی ئەوان هەیانبوو، "بە ویستی ئەوان سەرنەکەوت و توانیمان ئامانجەکەیان لەنێوبەرین." یەکێتیش دەڵێت: هەنگاوەکەیان دەستوورییە و "گرەنتییە بۆ مووچەخۆران."