پەیامنێری رووداو: پارتی هەر چوار کورسییەکەی سۆرانی بردووەتەوە

 

 

بەختیار قادر، پەیامنێری تۆڕی میدیایی رووداو لە سۆران بەیانیی ئەمڕۆ دووشەممە 11ی تشرینی یەکەمی 2021 لەمیانی بەشداریکردنی لە بوولتەنی هەواڵەکانی کاژێر 09:00 رایگەیاند، بەگوێرەی ئەو زانیارییە سەرەتاییانەی لە سەرچاوە جیاجیاکانەوە و بەتایبەتیش لە مەکتەبی هەڵبژاردنی پارتە سیاسییەکانەوە وەرگیراون، لە بازنەی 1ی هەڵبژاردنی هەولێر کە سنووری سۆران دەگرێتەوە و 4 کورسیی هەیە، 3 بەربژێری پیاو و بەربژێرێكی ژن کە سەر بە پارتی دیموکراتی کوردستانن، سەرکەوتنیان بەدەستهێناوە.

 

پەیامنێری رووداو ئاماژەی بەوەش کرد، نەهرۆ مەحموود یەکەم بووە و زیاتر لە 40 هەزار دەنگی بەدەستهێناوە، محەممەد سدیق دووەم بووە و زیاتر لە 37 هەزار دەنگی بەدەستهێناوە، سیپان شێروانی سێیەم بووە و نزیکەی 34 هەزار دەنگی بردووەتەوە، هەروەها فەیسەڵ کەریم خان چوارەم بووە و زیاتر لە 24 هەزار دەنگی بەدەستهێناوە، بەڵام بەو پێیەی دەبێت لە شوێنی براوەی چوارەم (فەیسەل کەریم خان) کە پیاوە و دەبێت ژنێک لە شوێنی ئەو وەکو کۆتا سەربکەوێت، بەربژێرێکی دیکەی پارتی دیموکراتی کوردستان کە جوان عەبدوڵڵایە و 13 هەزار دەنگی بەدەستهێناوە، لە شوێنی فەیسەڵ کەریم خان دەچێتە پەرلەمانی عێراق.

 

هاوکات سەرپەرشتیاری کۆمیسیۆن لە سۆران بە تۆڕی میدیایی رووداوی راگەیاند، تاوەکو ئێستا هیچ سکاڵایەک نە لەلایەن پارتە سیاسییەکان و نە لەلایەن چاودێرەکانەوە تۆمارنەکراوە و ئەمڕۆش دەرگا واڵایە بۆ تۆمارکردنی تانە لە ئەنجامی هەڵبژاردنەکان.

 

لەم هەڵبژاردنەدا لە بازنەی 1ی پارێزگای هەولێر نزیکەی 250 هەزار کەس مافی دەنگدانی هەبوو؛ بۆ بردنەوەی ئەو 4 کورسییەش 9 بەربژێر لە کێبڕکێدا بوون.