سلێمانی؛ دوای ئەنجامدانی دزی لە ماڵێک، پیاوی ماڵەکە گیانی لەدەستدا

 

سەعدییە حەمە ئەمین، دانیشتووی گەڕەکی سەرشەقامە لە سلێمانی و بە تۆڕی میدیایی رووداوی گوت، "دزەکان هاتنە ماڵ و گوتیان ئێمە فڵان و فڵانین، ناوی من و هاوژینەکەمیان گوت، ناوی کەسێکی ناسراوی منیان هێنا، گوتی هاتووین کاک خەلیل کێشەمان بۆ چارەسەر بکات، منیش گوتم لەماڵ نییە، گوتیان تۆ ئاومان بۆ بهێنە و دەچین لەفە دەخۆین تاوەکو خۆی دێتەوە، منیش گوتم نا مەچن لەماڵی ئێمە نان بخۆن، من چوزانم ئەوان نیازیان خراپە، دواتر هاتنە ژوورەوە و دەمانچەی خستە سەر سەرم و گوتی قسە بکەی دەتکوژم، دەست و دەم و قاچی بەستمەوە."

 

هاوژینی سەعدییە ناوی خەلیلە و تەمەنی 52 ساڵ بووە، دوای گەڕانەوەی لە نوێژی هەینی، دەبینێت سەعدییەی هاوژینی لە چێشتخانەی ماڵە بچوکەکەیان بەستراوەتەوە، دوای کردنەوەی دەست و دەمی، پەیوەندی بە پۆلیسەوە و دەکات، دواتر بەرگەی رووداوەکە ناگرێت و دەستبەجێ گیانی لەدەستدا.

 

سەعدییە حەمە ئەمەین باسی لەوەش کرد، "تەلەفۆنەکەی لێرەدا کرد و بە پشتا کەوت، گوتی سەعدییە جەڵتە لێیدام و ئیدی مرد."

 

پۆلیسی سلێمانی پەڕاوی لێکۆڵینەوەی بۆ رووداوی دزیکردنەکە کردووەتەوە و دەڵێن، سەرەداومان دەستکەوتووە. جەلیل سەعید، برای خەلیلە و گوتی، "کێشەکەمان رادەستی یاسا کردووە و کێشەمان لەگەڵ کەس نییە، گومانیشمان لەکەس نیە."

 

خەلیل لە ساڵی 1986 پۆلیسی ئاگرکوژێنەوە بووە، ماوەی 30 ساڵە لەگەڵ سەعدییە ژیانی هاوژینییان پێکهێناوە و منداڵیان نەبووە. بەگوتەی سەعدییە حەمە ئەمین، لە رووداوی دزیکردنەکەدا زیاتر لە 30 هەزار دۆلار، 6 ملیۆن دینار و ملوانکەیەکی ئاڵتونیان دزراوە.