رووداو دیجیتاڵ
پسپۆرێکی نەوت و کاریگەرییەکانی پیسبوون باس لەو گازانە دەکات، کە لە ئەنجامیی سووتانی کۆگاکانیی قیڕ سەر رێگەی هەولێر - گوێڕ تێکەڵ بە هەوا بوون و دەڵێت، چوار گازی مەترسیدارن و دەبنە هۆکاری چەندین نەخۆشی.
کاژێر 8:30ی خولەکی شەوی 12-06-2024 ئاگر لە سێ کۆگەی قیڕ کەوتەوە، دوای زیاتر لە 18 کاژێر ئینجا ئاگرەکە کوژایەوە، لە ئەنجامی سووتانی کۆگاکان ئاگرێکی زۆر تێکەڵ بە هەوای شاری هەولێر بوو.
د. رێبین سەمەد، پسپۆری نەوت و کاریگەرییەکانی پیسبوون بە رووداوی راگەیاند، بەهۆی سووتانی قیڕ چوار گازی مەترسیدار تێکەڵ بە هەوا دەبن، کە بریتین لە یەکەم ئۆکسیدی کاربۆن (CO)، دووانۆکسیدی کاربۆن (CO2)، دووانۆکسیدی نایترۆجین (NO2) و دووانۆکسیدی گۆگرد (SO2) لەگەڵ تەنۆلکەی ورد کە پێیاندەگوترێت PM.
سەبارەت بە کاریگەریی ئەو گازانە لەسەر تەندروستیی مرۆڤ، ئەو پسپۆرە گوتی: "سووتانی ئەو چوار گازانە دەبنە هۆکاری چەندین نەخۆشی، لەوانە تووشبوون بە شێرپەنجە، نەزۆکی، رووتانەوەی قژ، کێشەی هەناسەدان و هەستەوەری".
بە گوتەی ئەو پسپۆرە کاریگەریی ئەو دووکەڵەی بە ئاسماندا بڵاوبووەتەوە، تاوەکو 50 بۆ 80 کیلۆمەتر دەڕوات و دەڵێت: "ئەگەر دووکەڵەکە بە ئاراستەی شاری هەولێر هاتبا، یەک کەس لە ناو شار نەدەحەوایەوە." گوتیشی: "ئەو دووکەڵە لە داهاتوودا کاریگەریی لەسەر هەموومان دەبێت."
سەبارەت بە چۆنیەتی پاککردنەوەی ئەو هەوایەی پیسبووە، د. رێبین سەمەد دەڵێت: "ئەستەمە هەرێمی کوردستان و عێراق بتوانن ئەو هەوایە پاک بکەنەوە.
پسپۆرەکەی نەوت و کاریگەرییەکانی پیسبوون، باس لە رێگاکانی پاککردنەوەی خاکی پیسبوو بە دووکەڵەکە دەکات و دەڵێت: "دەتوانرێت بە رێگەی کیمیایی و فیزیایی پاک بکرێتەوە."
د. رێبین دەڵێت: "دەبێت پشکنین بۆ رادەی پیسبوونی خاکەکە بکرێت، دواتر خاکەکە بشۆردرێتەوە، ئەویش لە رێگەی ئاودانی خاکەکە و تێکەڵ کردنی پەینی ئۆرگانیک وەکو پاشماوەی ئاژەڵ بە خاکەکە.".
رێگەیەکی دیکەی پاککردنەوەی ئەو خاکە، بە قسەی ئەو پسپۆرە چاندنی ئەو دارانەیە کە هەوا پاکدەکەنەوە و دەشڵێت: "باشترین رێگە بۆ پاککردنەوەی خاکە پیسبووکە چاندنی پاقلەمەنییەکانە."
هەر سەبارەت بە کاریگەرییەکانی ئەو دووکەڵە لەسەر ژینگە و تەندروستیی مرۆڤ، ئەمڕۆ پێنجشەممە، 13ـی حوزەیرانی 2024 د. محەممەد قادر خۆشناو، پسپۆڕی نەخۆشییەکانی دڵ و لوولەکانی خوێن دەڵێت، تووشبووانی هەستیاری و نەخۆشییە درێژخایێنەکان زەرەرمەندی سەرەکین بۆ دووکەڵە ژەهراوییەکان کە لە ئەنجامی سووتان و موەلیدە و ئۆتۆمبێلەکانیش دەردەچن.
د. محەممەد خۆشناو، چەند گرووپێکی مەترسیدار بۆ دووکەڵی ژەهراوی باسدەکات وەکو تووشبووانی 'هەستیاری، رەبۆ، هەناسەتەنگی، بەرزەپەستانی خوێن و ئەوانەشی کە بەساڵاچوون یاخود منداڵن'.
لە بەشێکی قسەکانیدا هۆشداری دەداتە ئەوانەی لە ناوچەکانی دەوروبەری پاڵاوگە سووتاوەکەن بەوەی کە دەمامک ببەستن و دەڵێت: ''ئەگەر بۆیان بکرێت ناوچەکە جێبهێڵن''.
لەبارەی دانیشتووانی نێو شاری هەولێریش گوتی، هەرچەندە پێدەچێت کاریگەرییەکەی کەمتر بێت، بەڵام باشترە کە چوونە دەرەوە دەمامک ببەستن و زوو زوو دەموچاویان بشۆن.
لە کۆتایی قسەکانیدا رێنوێنیی هاونیشتمانییان دەکات، لەکاتی دەرکەوتنی هەر نیشانەیەکی وەکو 'کۆکە، هەناسەتەنگی، ئازاری سینگ و سەرسووڕان' سەردانی ناوەندێکی پزیشکی بکەن.
ئاگری کۆگەکەی سەر رێگەی هەولێر- گوێڕ لە شەوی رابردووەوە بەردەوامە و کۆنتڕۆڵ نەکراوە. سەرباز کەریم، بازرگانی نەوت و جۆرەکانی سووتەمەنی لەکاتی بەشداریکردنی لە بووڵتەنی ئابووریی تۆڕی میدیایی رووداو دا رایگەیاند: ''ئەو شوێنەی کە ئاگری گرتووە، تەنیا کۆگەی سووتەمەنیی فلۆرینە کە بۆ قیر بەکاردەهێنرێت.''
بەهۆی گەورەیی و تەوژمی ئاگرەکە، لە شەوی رابردووەوە بەردەوام تیمەکانی بەرگریی شارستانی لە هەوڵدان بۆ کۆنتڕۆڵکردنی و 40 تیمی ئاگرکوژێنەوە لە شوێنی رووداوەکە بوون و تائێستا 10 کەس بەهۆیەوە برینداربوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ