محەممەدی حاجی مەحموود، سکرتێری حیزبی سۆسیالیست دیموکراتی کوردستان.
رووداو دیجیتاڵ
سکرتێری حیزبی سۆسیالیست دیموکراتی کوردستان رایگەیاند، تاوەکو ئێستاش بەغدا بەپارێزگابوونی هەڵەبجەی بە پارێزگابوونی تەلعەفەر و شوێنی دیکە گرێداوە و دەشڵێت، "ئێستا خەڵکی هەڵەبجە شارەکەیان چۆڵ دەکەن و روو لە شارەکانی دیکە دەکەن".
سکرتێری حیزبی سۆسیالیست دیموکراتی کوردستان لە بانگەشەی هەڵبژاردنی هاوپەیمانی هەرێمی کوردستان گوتارێکی لە هەڵەبجە پێشکێشکرد باسی کۆمەڵێک پرسی تایبەت بە بانگەشەی هەڵبژاردن و شارەکە کرد.
ئەمڕۆ دووشەممە، 14ی ئۆکتۆبەر، محەممەدی حاجی مەحموود، سکرتێری حیزبی سۆسیالیست دیموکراتی کوردستان لە شاری هەڵەبجە گوتارێکی پێشکێشکرد و لە سەرەتادا گوتی: ''بانگەشە هەڵبژاردن سەنگەرگرتن و قسەکردن لە دژی یەکتری نییە و ئێمە لەگەڵ ئەوەداین بانگەشە هەڵبژاردن بەشێوەیەکی ئارام بەڕێوەبچێت''.
دواتر باسی هەڵەبجەی کرد و كێشەکانی بەپارێزگابوون و خزمەتگوزاری و قوربانیانی کیمیاباران و رایگەیاند: ''تاوەکو ئێستاش بەغدا بەپارێزگابوونی هەڵەبجەی بە پارێزگابوونی تەلەعفەر و شوێنی دیکە گرێداوە و عێراق لەسەر حیسابی ئەنفال و هەڵەبجە قەرەبووی کوێتی کردووەتەوە، تەنانەت ئامادە نییە داوای لێبووردن لە خەڵکی کوردستان و هەڵەبجە بکات''.
ئێران و تورکیا
محەممەدی حاجی مەحموود لەبارەی دەستوەردانەکانی ئێران و تورکیا لە عێراق و هەرێمی کوردستان گوتی: ''دەبێت رێککەوتنی 1984ی نێوان عێراق و تورکیا هەڵبوەشێتەوە و نابێت رێگەبدرێت خەڵکی ئێمە بە فڕۆکەکانی تورکیا شەهید بکرێن و دەبێ پەرلەمانی عێراق هەڵوێستی لەبەرامبەر کردەوەکانی تورکیا هەبێت، بەداخەوە ئێستا پەرلەمانی تورکیا بڕیار دەدات سوپاکەی بێتە نێو خاکی هەرێمی کوردستانەوە و سنوور ببەزێنێت. پەرلەمانی عێراق هیچی بە دەست نییە''.
سەبارەت بە ئێرانیش دەڵێت: ''ئێران ئاوی سیروانی گرتووەتەوە و کەس ناتوانێت قسە بکات، بە داخەوە خۆشمان پڕۆژەی نیشتمانی و نەتەوەییمان نییە و دەبێ گلەیی لە خۆمان بکەین''.
کەموکوڕییەکانی هەڵەبجە
محەممەدی حاجی مەحموود رووداوێک لەبارەی سەردانی وەزیری دەرەوەی ئەمریکا بۆ هەڵەبجە باس دەکات و گوتی: ''ئێمە 20 ساڵە لە یەک هۆڵی هەڵەبجە کۆدەبینەوە و کاتی خۆی وەزیری دەرەوەی ئەمریکا هاتە هەڵەبجە و شوێنێک نەبوو تێیدا بمێنێتەوە، زۆر کەس قسە لەسەر هەڵەبجە دەکەن، بەڵام لە ئەرزی واقیعدا هیچیان بۆ هەڵەبجە نەکردووە''. هەروەها گوتیشی ئێستا خەڵک هەڵەبجە چۆڵ دەکات و روو لە شارەکانی دیکە دەکات و هەڵەبجە ئەنجوومەنی پارێزگای نییە و پەراوێزخراوە و دەبێ پڕۆژەی بۆ جێبەجێ بکرێت.
هەڵوەشاندنەوەی پەرلەمانی کوردستان و دەستوور
محەممەدی حاجی مەحموود لەو کۆبوونەوەیەدا ئاماژەی بەوەدا هەر رێکخراو حیزبێک بۆ خۆی دەستوورێکی هەیە، بەڵام لە هەرێمی کوردستان 32 ساڵە دەستوورێکمان نییە و ئەگەر هەبوایە زۆر لە کێشەکانمان بۆ چارەسەر دەبوو، هاوکات دەبووە مەرجەع بۆ زۆربەی پرسەکان و لە درێژەی ئەو بابەتەدا گوتی: ''ئەگەر دەستوورمان هەبووایە بەغدا نەیدەتوانی پەرلەمان و دامەزراوەکانمان هەڵبوەشێنێتەوە، بە داخەوە پەرلەمانێکی تەمەن 32 ساڵەی هەڵوەشاندەوە''.
لەبارەی هەڵوەشاندنەوەی پەرلەمانی کوردستان ئاماژەی بە بێ هەڵوێستی لایەنە کوردستانییەکان کرد و گوتی: ''پەرلەمانی کوردستان هەڵوەشێندرایەوە و کەس نەیتوانی بڵێ نەخێر، ئەو پەرلەمانەی لە نەوەدەکان بە ئیرادەی میللەتێک دروستکرا و نەتەوەیەکگرتووەکان چاودێر بوون بەسەر هەڵبژاردنەکانەوە''. محەممەدی حاجی مەحموود لەبارەی بڕیاردەرانی بەغدا ئاماژەی بەوەدا، کە ئەوانەی ئێستا حاکمن لە بەغدا سەربازی هەڵاتووی سەردەمی بەعس بوون لە کوردستان.
لە کۆتاییدا دەڵێت: ''ئێمە نامانەوێت پەرلەمانێکی دەستەمۆمان ناوێت، پەرلەمانێکمان دەوێت خاوەنی بڕیار بێت و بەرگری لە خاک و نیشتمان و گەلەکەی بکات و گرنگە خەڵک بچێت دەنگ بدات''.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ