رووداو دیجیتاڵ
بڕیاری دابەشکردنی یەکەم سەبەتەی خۆراک بە هەرێمی کوردستان دراوە. بەڕێوەبەری دابەشکردنی خۆراک لە سلێمانی دەڵێت، لە چەند رۆژی داهاتوودا دەستپێدەکات.
کامەران فەتاح، بەڕێوەبەری بازرگانی و کەلوپەلی خۆراک لە سلێمانی، ئەمڕۆ یەکشەممە بە تۆڕی میدیایی رووداوی راگەیاند، لە بەغداوە بڕیار بۆ دابەشکردنی یەکەم بەشەخۆراکی ئەم ساڵ لە هەرێمی کوردستان دەرچووە.
بەڕێوەبەری بەڕێوەبەرایەتیی بازرگانی و کەلوپەلی خۆراک لە سلێمانی گوتی، "هەموو خۆراکێکی پێویست ئامادەیە بۆ دابەشکردن، جگە لە رۆنی شل، ئەویش بڕیارە لەم هەفتەیەدا بۆمان بنێردرێت."
کامەران فەتاح گوتیشی، دابەشکردنی بەشەخۆراک لە عێراق و هەرێمی کوردستان یەکخراوە و پێکەوە دابەش دەکرێت.
بەڕێوەبەرایەتی بازرگانی کەلوپەلی خۆراک لە هەولێر لە راگەیێندراوێکدا داوای لە بریکارەکانی خۆراک کردووە، کۆگە و دووکانەکانیان ئامادە بکەن و بۆ وەرگرتنی یەکەم بەشەخۆراکی ئەم ساڵ لە هەفتەی داهاتوودا.
پێرار 10 بەشەخۆراک و پاریش هەشت بەشەخۆراک دابەشکرا.
لە بەشەخۆراکی مانگانەدا یەک لیتر رۆنی شل، یەک قوتوو ئاوی تەماتە، سێ کیلۆ برنج، یەک کیلۆ شەکر، نیو کیلۆ نیسک و نیوکیلۆ لەتکە نۆک دابەش دەکرێ.
پێش گۆڕینی فۆرمی خۆراک بۆ ئەلیکترۆنی، لە 5 ملیۆن و 386 هەزار و 51 هاونیشتمانی لە هەرێمی کوردستان بەشەخۆراکی مانگانەیان وەردەگرت، بەڵام بەگوێرەی دوایین ئاماری وەزارەتی بازرگانی، 294 هەزار و 432 هاونیشتمانی بەهۆی تۆمارنەکردنیان لە سیستمی ئەلیکترۆنی بەشەخۆراکیان بڕدراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ