رووداو دیجیتاڵ
لە پارێزگای مەرەشی باکووری کوردستان، بوومەلەرزەیەک بە گوڕی 4 پلەی رێختەر روویدا.
سەرۆکایەتیی کارەساتی لەناکاو و فریاگوزاریی تورکیا - ئافاد بڵاویکردەوە، کاژێر 08:49 خولەکی ئەمڕۆ چوارشەممە 15ـی ئاداری 2023، بوومەلەرزەیەک بە گوڕی 4 پلەی رێختەر لە پارێزگای مەرەشی باکووری کوردستان روویداوە.
شارۆچكەی نورداغی چەقی بوومەلەرزەکە بووە و لە قووڵایی 7.72 کیلۆمەتر تۆمارکراوە.
هاوکات هەر ئەمڕۆ لە پارێزگای عوسمانییەی تورکیا بوومەلەرزەیەک روویدا.
ئافاد بڵاویکردەوە، کاژێر 06:29 خولەکی بەیانیی ئەمڕۆ چوارشەممە 15ـی ئاداری 2023، بوومەلەرزەیەک بە گوڕی 3.9 پلەی رێختەر لە پارێزگای عوسمانییە لە قووڵایی 7 کیلۆمەتر تۆمارکراوە.
ئافاد دەڵێت، لە رۆژی 6ی شوباتەوە زیاتر لە 17 هەزار پاشلەرزە لە باکووری کوردستان و تورکیا تۆمارکراون.
ئەوەی کە پەیوەندی بە زیانی بوومەلەرزەکەی رۆژی 6ی شوباتەوە هەیە کە 11 پارێزگای باکووری کوردستان و تورکیای گرتەوە 48 هەزار و 448 کەس گیانیان لەدەستداوە و زیاتر لە 115 هەزار کەسیش بریندار بوون.
بوومەلەرزەکە کاریگەری گەورەیشی لەسەر بەشێکی رۆژئاوای کوردستان و سووریا هەبوو و بەو هۆیەوە نزیکەی 6 هەزار کەس لەوێ گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ