رووداو دیجیتاڵ
گوتەبێژی وەزارەتی دەرەوەی ئێران لە 36ـەمین ساڵیادی کیمیابارانکردنی هەڵەبجەدا دەڵێت، "کارەساتی هەڵەبجە برینێکە هەرگیز لەبیر ناکرێت" و دەشڵێت، ئەو تراژیدیە دەریخست، رۆژئاوا پێوەری جیاوازی بۆ چەمکی مافی مرۆڤ هەیە.
رۆژی هەینی 15ـی ئاداری 2024، ناسر کەنعانی، گوتەبێژی وەزارەتی دەرەوەی ئێران لە تۆڕی کۆمەڵایەتی ئێکس نووسینێکی بڵاوکردەوە و تێیدا هاتووە، "16ـی ئادار ساڵڕۆژی هێرشی دڕندانەی رژێمی بەعسە کە بە چەکی کیمیایی هێرشی کردەسەر خەڵکی بێتاوانی هەڵەبجە؛ ئەو رۆژەی چارەنووسی شارێک لە چەند چرکەیەکدا گۆڕدرا و زیاتر لە 10 هەزار کەس بەهۆی هەڵمژینی گازی ژەهراوییەوە گیانیان لەدەستدا".
ناسر کەنعانی دەڵێت، "بۆ خەڵکی هەڵەبجە و خەڵکی شارەکانی سەر سنووری ئێران کە پێشتر کەوتبوونە بەر هێرشی چەکە کیمیاییەکان و ئەو کات باوەشیان بۆ بریندارانی ئەو کارەساتە مێژووییە کردەوە، ئەو رۆژە رەش و نەگریسە هیچکات لەبیر ناکرێت".
گوتەبێژی وەزارەتی دەرەوەی ئێران رەخنەی تووند لە کۆمەڵگەی نێودەوڵەتی دەگرێت و دەڵێت، "بیرهێنانەوەی کارەساتی تاڵی هەڵەبجە لە مێژوودا، کاتێک قورستر دەبێت کە بیرمان دەکەوێتەوە، رژێمی بەعس بەهۆی هەندێک وڵاتی ئەوروپییەوە توانی بۆمبی کیمیایی دروستبکات و سەرباری قەدەخەکردنی بەکارهێنانی ئەو چەکە نامرۆڤانەیە، چەندین جار لە شەڕی سەپێندراودا دژی هێزەکانی ئێران بەکاریهێنا و دواجاریش بۆ سزادانی خەڵکی باکووری عێراق، بە شێوەیەکی بەرفراوان ئەو چەکەی بەکارهێنا".
ناسر کەنعانی دەڵێت، "پشتیوانی و کاردانەوەی هەندێک وڵاتی رۆژئاوایی لە دابینکردن و بەکارهێنانی چەکی کیمیایی لەلایەن رژێمی بەعسەوە زۆر بەئازارتر بوو لەو برین و ئازارانەی خەڵکی هەڵەبجە و سەردەشت بەهۆیەوە چەشتییان".
16ـی ئاداری 1988، شاری هەڵەبجە لەلایەن دەسەڵاتی ئەو کاتی عێراقەوە کیمیاباران کرا و لە ئەنجامدا نزیکەی پێنج هەزار هاونیشتمانی شارەکە شەهید بوون و زیاتر لە 10 هەزاری دیکە بریندار بوون.
پێشتر و لە 28ی حوزەیرانی 1987 دەسەڵاتی بەعس شاری سەردەشتی لە رۆژهەڵاتی کوردستان بۆردوومانکرد. حکومەتی ئێران شەهیدبوونی 110 کەس و برینداربوونی هەزار و 500 کەسی راگەیاندووە، بەڵام بەپێی ئاماری ئەنجوومەنی داکۆکی لە مافی قوربانییانی کیمیایی سەردەشت، لەو هێرشەدا 120 کەس شەهید بوون و زیاتر لە هەشت هەزار کەسیش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ