رووداو دیجیتاڵ
لە پارێزگای وانی باکووری کوردستاندا ناوچەیەک کە بە (بووکی گریاو) دەناسرێت و کەوتووەتە گۆڕستانێکەوە، رۆژانە چەندین گەشتیار بۆ بینینی جۆرە گوڵێک رووی تێدەکەن.
گوڵی لالە بە شێوەیەکی سروشتی لە گۆڕستانی گوندی دیلمەتاشی سەر بە ناوچەی گەڤاش روواون و تەنیا نزیکەی 20 رۆژ بە گەشی دەمێنێتەوە.
گوڵەکان شەوانەش هەر گەشن، ئەمەش وایکردووە کە شەو و رۆژ گەشتیاری بۆ بچێت.
گوڵە لالەکان بە رەنگە سوور، زەرد و جەرگییەکانیان ناوچەکەیان رازاندووەتەوە. لەگەڵ تریفەی ئەستێرەکان و رووناکییەکانی شار، دیمەنێکی سەرنجڕاکێشی تابلۆئاسا دەنەخشێنن.
ژینگەدۆستان و وێنەگران کە روو لەو ناوچەیە دەکەن و وێنەی ئەو گوڵە دەگمەن و تازەپشکوتووانە دەگرن.
گوڵەکان لەلایەن پاسەوانانی گوند و دانیشتووانی ناوچەکەوە بە وردی چاودێری دەکرێن و دەپارێزرێن.
وەحدەدین بایەزید، کە یەکێک لە گوندنشینانە دەڵێ، خەڵکی زۆر بۆ بینینی گوڵی لالە روو لە گۆڕستانەکە دەکەن و گوتی: "رۆژانە بە سەتان کەس سەردانمان دەکەن. هەندێکجار ئەوەندە زۆرن، لە گۆڕستانەکەدا شوێن نامێنێت. بەهۆی ئەوانەوە گوندەکەمان دەناسرێت. لە ئیستەنبووڵ، ئیزمیر، ئەنتالیا و زۆر شارەوە دێن. ئێرە لە بەیانییەوە تاوەکو درەنگی شەو قەرەباڵخە. تەنیا داوامان لێیان ئەوەیە زیان بە لالەگوڵەکانمان نەگەیەنن و لێیان نەکەنەوە".
بەگوێرەی نووسینگەی موختاری گوندی دیلمەتاش رۆژانە نزیکەی 1500 کەس سەردانی بووکی گریاو دەکەن.
تەمەنی ئەو گوڵانە تەنیا 15 بۆ 20 رۆژە. بەهۆی ساردیی کەشوهەواوە، ئەمساڵ درەنگ پشکووتوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ