رووداو دیجیتاڵ
نوێنەرێکی مامۆستایانی وانەبێژ دەڵێت، سبەی بە فەرمی لیستی ناوی مامۆستایانی وانەبێژ رادەست دەکرێت بۆ ئەوەی بکرێنە گرێبەست.
عەلی رەئووف، یەکێک لە نوێنەرانی مامۆستایانی وانەبێژ، ئەمڕۆ یەکشەممە، 15-09-2024، بە رووداوی گوت: ئەنجوومەنی وەزیرانی هەرێمی کوردستان رەزامەندی لەسەر ناوی سەرجەم مامۆستایانی وانەبێژ دەربڕیوە بۆ ئەوەی بکرێنە گرێبەست.
عەلی رەئووف گوتی: "سبەی ئەنجوومەنی وەزیران ناوەکان بۆ وەزارەتی دارایی دەنێرێت و بە فەرمی دەبینە مامۆستای گرێبەست و مووچەمان بۆ دەبەسترێت".
رۆژی 13-09-2024، لیژنەی تایبەتمەند لە وەزارەتی پەروەردە وردبینیی لە لیستی ناوی مامۆستایانی وانەبێژ کرد و زانیارییەکانی تەواوکرد، دواتر لیستەکە رەوانەی ئەنجوومەنی وەزیران کرا.
25ـی ئاب، حکومەتی هەرێمی کوردستان بڕیاری دا وانەبێژان بکاتە گرێبەست و بڕیارە تاوەکو 25ـی ئەم مانگە رێکارەکانی بەگرێبەستبوونەکە کۆتایی بێت.
کەمترین مووچەی وانەبێژ 250 هەزار دینارە و زۆرترینیشیان 400 هەزار، ئەوەش بەگوێرەی بڕوانامەکانیان پۆلێن دەکرێت.
بەگوێرەی ئاماری وەزارەتی دارایی و ئابووری، ژمارەی وانەبێژان لە هەرێمی کوردستان 38 هەزارە، ئەگەر وانەبێژان وەکو گرێبەست دابنرێن، مانگانە پێویستیان بە 18 ملیار دینار دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ