رووداو دیجیتاڵ
بە فەرمانێکی وەزاریی وەزیری پێشمەرگە زیاتر لە 8700 پلەدارو و پێشمەرگە پلەکەیان بەرزکرایەوە و وەزیری پێشمەرگەش پیرۆزبایی لێکردن و رایگەیاند، دابینکردنی مافەکانی پێشمەرگە و باشتکردنی ژیان و گوزەرانیان، ئەولەوییەتی کارەکانیانە.
وەزارەتی پێشمەرگە لە راگەیێندراوێکدا رایگەیاند، بە دوو لیست پلەی 8721 پێشمەرگە و پلەدار، کە سەر بە دیوانی وەزارەت و لیواکانن بەرزکراوەتەوە.
لیستی یەکەم لە 4270 پێشمەرگە و پلەدار و لیستی دووەمیش لە 4451 پێشمەرگە و پلەدار پێکدێت.
شۆڕش ئیسماعیل، وەزیری پێشمەرگە ئەمڕۆ پێنجشەممە، بەم بۆنەیەوە لە راگەیێندراوێکدا رایگەیاند: "دابینکردنی مافەکانی پێشمەرگە و باشتکردنی ژیان و گوزەرانیان، ئەولەوییەتی کاری حکومەت و وەزارەتی پێشمەرگە و پڕۆسەی چاکسازییە."
وەزیری پێشمەرگە دەڵێت، هەموو هەوڵەکانیان لەم پێناوەدا بەردەوامە کە هێزی پێشمەرگەی کوردستان شایستەبوونی پلەکانیان لە وادەی یاسایی و کارگێڕی خۆیدا بەرزبکرێتەوە.
وەزیری پێشمەرگە، داواش دەکات لە بەرامبەر بەرزکردنەوەی شایستەی پلەکانیان، "دەبێت پێشمەرگە وەک هەمیشە لە ئەرکی پاراستنی خاک و سنوور و خەڵکی کوردستان و جێبەجێکردنی دیسپلینی سەربازییانەی سەردەم بەردەوامبن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ