محەممەد بن زاید بۆ نێچیرڤان بارزانی: سوپاس بۆ دۆستایەتی و هاوسۆزیتان

رووداو دیجیتاڵ

سەرۆکی هەرێمی کوردستان و شاندی باڵای یاوەری گەیشتنە ئەبوزەبی-ی پایتەختی ئیمارات بەمەبەستی بەشداریکردن لە پرسەی خەلیفە بن زاید، سەرۆکی کۆچکردووی ئەو وڵاتە و سەرەخۆشییان لە محەممەد بن زاید کرد.

بەپێی راگەیێندراوی سەرۆکایەتیی هەرێمی کوردستان، پاشنيوه‌ڕۆى رۆژی دووشه‌ممه‌ 16ی ئایاری 2022 نێچيرڤان بارزانى، سه‌رۆكى ‏هه‌رێمى كوردستان بۆ به‌شدارى له‌ پرسه‌ى خه‌ليفه‌ بن زايد ئال نه‌هيان، سه‌رۆكى كۆچكردووى ئيمارات گه‌يشته‌ ئه‌بوزه‌بى و له‌لايه‌ن ‏محه‌مه‌د بن زايد ئال نه‌هيان، سه‌رۆكى ئيمارات پێشوازیی لێ كرا.‏

شاندى ياوه‌رى نێچیرڤان بارزانى له‌ هەریەکە لە قوباد تاڵه‌بانى، جێگرى سه‌رۆکوه‌زيرانى هه‌رێمى كوردستان؛ مسته‌فا سه‌يد قادر، جێگرى سه‌رۆكى هه‌رێمى ‏كوردستان و فه‌وزى هه‌ريرى، سه‌رۆكى ديوانى سه‌رۆكايه‌تيى هه‌رێمى كوردستان پێكهاتبوو.‏

وەکو لە راگەیێندراوی سەرۆکایەتیی هەرێمی کوردستاندا هاتووە، سەرۆکی هەرێمی کوردستان پرسه‌ و سه‌ره‌خۆشيى خۆي و گه‌لى كوردستانى به‌ محەممەد بن زايد ئال نه‌هيان و بنەماڵەی ئال نه‌هيان و ‏حكومه‌ت و گه‌لى ئيمارات گه‌ياند، هاوخه‌مى و هاوسۆزیی له‌گه‌ڵياندا ده‌ربڕى و "هيواى خواست خواى مه‌زن گيانى خوالێخۆشبوو به‌ به‌زه‌يى و ميهره‌بانيى خۆى شاد ‏بكات و ئارامى و دڵنه‌وايى بۆ هه‌مووان ببه‌خشێت."

لاى خۆيه‌وه‌ محەممەد بن زايد ئال نه‌هيان، سه‌رۆكى ئيمارات "سوپاس و پێزانينى خۆيان و خانه‌واده‌ به‌ڕێزه‌كه‌يان و سه‌ركردايه‌تيى وڵاته‌كه‌ى بۆ ‏به‌شدارى و هاوبه‌شيى سه‌رۆك نێچيرڤان بارزانى و شاندى ياوه‌رى له‌ پرسه‌كه‌ياندا ‏ده‌ربڕى و ستايشى خۆيان و وڵاته‌كه‌ى بۆ دۆستايه‌تى و هاوسۆزيى هه‌رێمى ‏كوردستان له‌گه‌ڵ ئيمارات دووپات كرده‌وه‌."

هەروەها بەبۆنەی هەڵبژاردنی محەممەد بن زاید وەکو سەرۆکی نوێی ئیمارات، سەرۆکی هەرێمی کوردستان و شاندی باڵای یاوەری هیوای سەرکەوتنیان بۆ خواست.