رووداو دیجیتاڵ
گوتەبێژی دەستەی کەشناسی و بوومەلەرزەزانیی عێراق دەڵێت، بوومەلەرزەیەک لە پارێزگای دهۆک لە هەرێمی کوردستان روویداوە و هیچ زیانێکی نەبووە.
رۆژی پێنجشەممە، 16-11-2023، عامر جابری، گوتەبێژی دەستەی کەشناسی و بوومەلەرزەزانیی هەرێمی کوردستان لەبارەی ئەو بوومەلەرزەیەی ئەمڕۆ لە پارێزگای دهۆک تۆمارکرا بە تۆڕی میدیایی رووداوی راگەیاند، "کاژێر 2:31ـی بەرەبەیانی ئەمڕۆ بوومەلەرزیەک بە گوڕی 3.4 پلە بە پێوەری رێختەر لە سنووری نێوان عێراق و تورکیا و بە دووری 20 کیلۆمەتر لە باکووری رۆژهەڵاتی قەزای ئامێدیی پارێزگای دهۆک تۆمارکرا."
عامر جابری گوتی، " بەپێی بەدواداچوونەکانی ئێمە، ئەو بوومەلەرزەیە هیچ زیانێکی گیانی و مادی نەبووە"؛ داواشی لە هاووڵاتییان کرد لەکاتی روودانی بوومەلەرزە لە ماڵەکانیان بچنە دەرەوە و هەوڵبدەن لەو شوێنانە بمێننەوە کە بەتایبەت بنمیچی کۆنکرێتیان نییە."
بەپێی راپۆرتێکی دەستەی کەشناسی و بوومەلەرزەزانیی عێراق کە رۆژی 3-10-2023 بڵاوکرایەوە، لە مانگی ئەیلوولدا 48 بوومەلەرزە لە عێراق تۆمارکراون و گوڕەکانیان لەنێوان 1 بۆ 5.2 پلە بە پێوەری رێختەر بووە؛ قووڵاییشیان لەنێوان 6 بۆ 29 کیلۆمەتر بووە.
بەگوێرەی راپۆرتەکە، مانگی ئەیلوول بە 15 بوومەلەرزە، پارێزگای سلێمانی زۆرترین چالاکیی بوومەلەرزەی تێدا بووە؛ دوای ئەو بە حەوت بوومەلەرزە پارێزگای هەولێر هاتووە؛ شەش بوومەلەرزەش لە پارێزگای واست و چوار بوومەلەرزەش لە پارێزگای نەینەوا روویانداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ