کوردستان
مەسرور بارزانی، سەرۆکی حکومەتی هەرێمی کوردستان لەگەڵ دەیڤد کامیرۆن، وەزیری دەرەوەی بەریتانیا
رووداو دیجیتاڵ
سەرۆکوەزیرانی هەرێمی کوردستان لە چوارچێوەی کۆڕبەندی داڤۆس لەگەڵ وەزیری دەرەوەی بەریتانیا کۆبووەوە. حکومەتی هەرێمی کوردستان دەڵێت، وەزیرە بەریتانییەکە بە تووندی سەرکۆنەی هێرشەکەی کرد و بە دەستدرێژیی بۆ سەروەریی عێراق ناویبرد.
رۆژی پێنجشەممە، 18-01-2024، مەسرور بارزانی، سەرۆکی حکومەتی هەرێمی کوردستان لە داڤۆسی سویسرا لەگەڵ دەیڤد کامیرۆن، وەزیری دەرەوەی بەریتانیا کۆبووەوە و بەگوێرەی راگەیێندراوی حکومەت، لە دیدارەکەدا تەوەری سەرەکیی گفتوگۆکەیان لەبارەی هێرشەکانی ئێران بوو بۆ سەر هەولێر."
لە راگەیێندراوەکەدا هاتووە، وەزیری دەرەوەی بەریتانیا پرسە و هاوخەمیى خۆی بە مەسرور بارزانی گەیاند و هێرشەکەی بە تووندی سەرکۆنە کرد و گوتی، "هیچ پاساوێکی نییە و دەستدرێژییە بۆ سەروەریى عێراق و قبووڵکراو نییە." لە بەرامبەردا سەرۆکی حکومەتی هەرێمی کوردستان سوپاسی هاوخەمی و پشتیوانیی بەریتانیای کرد.
حکومەتی هەرێمی کوردستان دەڵێت، "هەردوولا هاوڕابوون لەسەر بەردەوامبوونی هاریکاری و هەماهەنگی بۆ رووبەڕووبوونەوەی تیرۆریستانی داعش و تیرۆر بەگشتی.
لە کۆتایی راگەیێندراوەکەدا حکومەتی هەرێمی کوردستان باس لەوە دەکات، "پەرەپێدانی پەیوەندیی دۆستانەی نێوان هەرێمی کوردستان و بەریتانیا و گرنگیی چارەسەرکردنی کێشەکانی هەرێمی کوردستان و حکومەتی فیدراڵ و دابینکردنی مافە دەستووری و شایستە داراییەکانی هەرێمی کوردستان."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ