رووداو دیجیتاڵ
بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان رایگەیاند، چوار هەزار پاسپۆرت لە بەڕێوەبەرایەتیی پاسپۆرتی هەولێر تەواو بوون و خاوەنەکانیان ناچن وەریانبگرنەوە.
هێمن میرانی، بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان، رۆژی هەینی لە پەیجی خۆی لە تۆڕی کۆمەڵایەتیی فەیسبووک بڵاوی کردووەتەوە، هەندێک لەو پاسپۆرتانە ساڵ و چەند ساڵێک بەسەر چاپکردنیان تێپەڕیوە، بەڵام خاوەنەکانیان نایەن وەریانبگرنەوە.
بەرپرسەکەی وەزارەتی ناوخۆ دەڵێت: "کاتێک گوشار لەسەر بەڕێوەبەرایەتییەکانمان هەیە واستەی دونیا دەکەن، گوشاری دونیامان بۆ دێنن بەس نۆرەیەکی پاسپۆرت وەربگرن، ئێستاش ئەوەتا پاسپۆرتەکانیان دەرچووە و پارەیان خەرج کردووە ناچن وەریگرنەوە."
لە سنووری پارێزگای هەولێر چوار نووسینگەی دەرهێنان و نوێکردنەوەی پاسپۆرت هەن. ئەوانیش نووسینگەی یەکی پاسپۆرتی پارێزگای هەولێر، نووسینگەی دووی پاسپۆرتی پارێزگای هەولێر، نووسینگەی پاسپۆرتی سۆران و نووسینگەی پاسپۆرتی کۆیە.
بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان، تکا لە خاوەنی ئەو پاسپۆرتانە دەکات، بچن پاسپۆرتەکانیان وەربگرنەوە.
کاتەکانی دانەوەی پاسپۆرت لە رۆژانی دەوامی فەرمی لە کاژێر 8:00ـی بەیانی تاوەکو 06:00ـی ئێوارەیە، هەروەها داواکراوە بۆ وەرگرتنەوەی پاسپۆرت پێویستە ئەو کەسەی وەریدەگرێتەوە بەڵگەنامەی فەرمی پێبێت کە کارتی نیشتمانی یان ناسنامەی باری شارستانییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ