رووداو دیجیتاڵ
ژووری بازرگانی و پیشەسازیی دهۆک دەڵێت، بەرهەمی خۆماڵی و وڵاتانی دیکە دەکەنە جێگرەوەی بەرهەمی ئێرانی.
رۆژی شەممە، 20ـی کانوونی دووەمی 2024، ژووری بازرگانی و پیشەسازیی دهۆک لە راگەیێندراوێکدا لەبارەی بایکۆتکردنی کاڵای ئێرانی گوتی، "لەبەر ئەوەی ژمارەیەکی گەورەی بەرهەمی ئێرانی لە بازاڕەکانماندا هەن، ئێمە لە ژووری بازرگانی و پیشەسازیی دهۆک بە وردی لێکۆڵینەوە لەسەر دۆزینەوەی بازاڕی جێگرەوە بۆ بازرگانەکانمان دەکەین".
گوتیشی، "هەوڵدەدەین شوێنی بەرهەمی ئێرانی، بە بەرهەمی نێوخۆیی و وڵاتانی دیکەی ناوچەکە و جیهان پڕبکەینەوە."
شەوی رابردوو، ژووری بازرگانی و پیشەسازیی هەولێر لە راگەیێندراوێکدا داوای لە بازرگان و هاونیشتمانییان کرد هاوردەکردن و بەکارهێنانی کاڵای ئێرانی بایکۆت بکەن.
سەرلەبەیانی ئەمڕۆ شەممە، سەرۆکی ژووری بازرگانی و پیشەسازیی هەولێر گوتی، بایکۆتکردنی هاوردە و بەکارهێنانی کاڵای ئێرانی بڕیارێکی جێبەجێکاری نییە، ''بەڵام داوا لە سەرجەم بازرگانان دەکەین، لەوبارەوە هەڵوێستێکی نیشتمانییان هەبێت.''
گەیلان حاجی سەعید، سەرۆکی ژووری بازرگانی و پیشەسازیی هەولێر لە کاتی بەشداریکردنی لە بوولتەنی کاژێر 09:00ـی تۆڕی میدیایی رووداو کە محەممەد شێخ فاتیح پێشکێشی کرد، لەبارەی داوای ژوورەکەوە بۆ بایکۆتکردنی هاوردە و بەکارهێنانی کاڵای ئێرانی رایگەیاند، ''سەرەڕای داواکەمان بۆ بایکۆتکردن، ئێمە رێگری لە هیچ بازرگانێک ناکەین بۆ هاوردەکردنی کاڵا و شتومەکی ئێرانی.''
باسی لەوەش کرد، دوای داواکارییەکەی ژووری بازرگانیی هەولێر بۆ بایکۆتی هاوردەکردنی کاڵای ئێرانی، چاوەڕێی وەڵام و هەڵوێستی بازرگانان و ژوورە بازرگانییەکانی ئێرانیش دەکەن؛ دەشڵێت، ''دەبێ بازرگانانی ئێران و ژوورە بازرگانییەکانیان بەرامبەر شەهیدبوونی پێشڕەو دزەیی هەڵوێستیان هەبێت، چونکە بازرگان هەر بازرگانە، چی لە وڵاتی ئێران بێت و چی لە هەرێمی کوردستان.''
بەپێی زانیارییەکانی ژووری بازرگانی و پیشەسازیی هەولێر، ساڵانە حەوت بۆ هەشت ملیار دۆلار کاڵا لە ئێرانەوە هاوردەی عێراق دەکرێت کە نزیکەی دوو ملیار و 500 ملیۆن دۆلاری لە سنوورەکانی هەرێمی کوردستانەوەیە بەڵام دواتر 70٪ـی کاڵا هاوردەکان دەگوازرێنەوە بۆ شارەکانی خواروو و ناوەڕاستی عێراق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ