رووداو دیجیتاڵ
ئەندامێکی ئەنجوومەنی باڵای سیاسی و بەرژەوەندیی یەكێتی نیشتمانی کوردستان، رایگەیاند دوژمنانی گەلی کوردستان بە بەرنامەیەکی ستراتیژی و ئەمنیی داڕێژراو، پلانیان بۆ بچووکردنەوەی هەرێمی کوردستان و بزووتنەوە رەواکەی داناوە، دەشڵێت "دەبێت پەند لە رابردوو وەربگرن، گەلی کورد لەناوناچێت."
رۆژی پێنجشەممە، 22-6-2023، حاکم قادر حەمەجان، ئەندامی ئەنجوومەنی باڵای سیاسی و بەرژەوەندیی یەكێتیی نیشتمانی کوردستان سەردانی کۆمەڵەی رۆشنبیریی موختارەکانی کوردستانی لە شاری سلێمانی کرد و باسی ژمارەیەک بابەتی نێوخۆیی هەرێمی کوردستان و عێراقی کرد.
بەپێی راگەیێندراوی نووسینگەکەی، حاکم قادر لەبارەی پەیوەندییەکانی نێوان یەکێتی و پارتی کە زیاتر لە ساڵێک دەبێت بە هەوراز و نشێو و گرژیی و ساردیدا تێدەپەڕێت، رایگەیاندووە: "مامەڵەکردن بە تۆڵەکردنەوە و لۆژیکی کار و کاردانەوە لە نێوان هەردوو حیزبدا جگە لە زیانگەیاندن بە دۆزی کورد و قازانج بە دوژمنانی گەلی کوردستان، هیچ بەرهەمێکی دیکەی نابێت."
هەر بەپێی راگەیێندراوەکە، حاکم قادر گوتوویەتی: "دوژمنانی گەلی کوردستان بە بەرنامەیەکی ستراتیژی و ئەمنیی داڕێژراو، پلانیان داناوە بۆ بچووککردنەوەی هەرێمی کوردستان و حکومەتەکەی و بزووتنەوە رەواکەی."
حاکم قادر حەمەجان، ئەندامی ئەنجوومەنی باڵای سیاسی و بەرژەوەندیی یەكێتی نیشتمانی کوردستان، ئاماژەی بۆ ئەوەشکردووە، هەرێمی کوردستان هەرێمێکی دەستوورییە و گەلی کوردستان خەباتی کردووە بۆ ئەم هەرێمە و گەشەپێدانی ویستی گەلەکەمانە، راشیگەیاند: "دەسەڵاتداران لە عێراق و فراکسیۆنە سیاسییەکان، هەقە پەند لە رابردوو وەربگرن، بە پێشێلکردنی مافە نەتەوەییەکانی کورد و بچووککردنەوەی هەرێمی کوردستان، گەلی کورد لەناو ناچێت و ئاشتی لە عێراق بەرقەرار نابێت."
ئەندامەکەی ئەنجوومەنی باڵای سیاسی و بەرژەوەندیی یەكێتیی نیشتمانی کوردستان، سەبارەت بە هەڵبژاردنی پەرلەمانی کوردستان و ئەنجوومەنی پارێزگاکانی عێراق دەڵێت: "یەکێتی لەگەڵ ئەنجامدانی هەڵبژاردنێکی پاک و بێگەرد و سەردەمیانەدایە کە بەخێراترین کات بکرێت، بۆ هەڵبژاردنی ئەنجوومەنی پارێزگاکانی عێراقیش، بە پێویستی دەزانین لە کەرکووک و ناوچە کوردستانییەکانی دەرەوەی هەرێمی کوردستان، گەلی کوردستان بە یەک لیست بچنە هەڵبژاردنەوە و ئەوە باشترین بژارەیە."
ئەنجوومەنی باڵای سیاسی و بەرژەوەندیی یەكێتی نیشتمانی کوردستان لە دوای کۆنگرەی چواری یەکێتی پەسەندکرا و ئەندامەکانی ئەنجوومەنەکە پێکهاتوون لە کۆسرەت رەسوول (سەرۆکی ئەنجوومەن)، مەلا بەختیار، هێرۆ ئیبراهیم ئەحمەد، عومەر فەتاح، عەدنان موفتی، حاکم قادر، ئەرسەلان بایز، دلێری سەید مەجید و شێخ جەعفەر.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ