رووداو دیجیتاڵ
پەرلەمانتارێکی شاری ورمێ رایگەیاند، 51٪ـی ئەو بەشەئاوەی بۆ ژیاندنەوەی دەریاچەی ورمێ تەرخانکراوە، دەگوازرێتەوە پارێزگاکانی دیکە.
سەلمان زاکر، پەرلەمانتاری ئازەریزمانی شاری ورمێ رۆژی پێنجشەممە، 23-10-2025، لە کۆبوونەوەی پەرلەمانتاران و ژمارەیەک چالاکڤانی شارەکە لەگەڵ سەرۆککۆماری ئێران لە ورمێ رایگەیاند، بەشی زۆری ئەو ئاوەی بە ناوی ژیاندنەوەی دەریاچەی ورمێ لە رووبارەکانی جەخەتوو و تەتەهوو دابین دەکرێت، ناگاتە دەریاچەی ورمێ و دەگوازرێتەوە بۆ پارێزگاکانی دیکە.
بە گوتەی ئەو پەرلەمانتارە، ساڵانە 300 ملیۆن مەتری سێجا ئاوی ئەو دوو رووبارە بۆ پارێزگای ئازەربایجانی رۆژهەڵات (تەورێز و شارەکانی دەوروبەری) دەگوازرێتەوە.
رووباری تەتەهوو لە ناوچە کوێستانییەکانی نێوان سەقز و بانە لەگەڵ باشووری کوردستان سەرچاوە دەگرێت و بە سەقز و بۆکاندا دەڕژێتە نێو بەنداوی میاندواو. رووباری جەخەتووش لە کوێستانەکانی ناوچەی خوڕخوڕەی سەقزەوە سەرچاوە دەگرێت و بە تێکەڵبوونەوەی رووبارەکانی تیکاب و دیواندەڕە و سائین قەڵا دەڕژێتە بەنداوی میاندواو.
پڕۆژەی گواستنەوەی ئاوی ئەو دوو رووبارە لە ساڵی 1998ـەوە دەستیپێکردووە و سەرەتا بڕیار بوو ئاوی ئەو دوو رووبارە بۆ ژیاندنەوەی دەریاچەی ورمێ تەرخان بکرێت، بەڵام ئەو ئاوەی دەگوازرێتەوە دەبرێتە پارێزگای تەورێز و بۆ دابینکردنی ئاوی خواردنەوە، کشتوکاڵ و هەروەها کەرتی پیشەسازی سوودی لێوەردەگیرێت. ئەوە لە کاتێکدایە بەشی زۆری دەریاچەی ورمێ وشکبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ