رووداو دیجیتاڵ
مەسعود پزیشکیان، سەرۆککۆماری ئێران رۆژی یەکشەممە، 23-10-2025، لە شاری ورمێ لەگەڵ ژمارەیەک چالاکڤان و بەرپرسی پارێزگای ورمێ کۆبووەوە و رەخنەی لە تێکدانی شارەکانی ورمێ و مهاباد گرت.
پزیشکیان لە گوتارەکەیدا گوتی، شارەکان تێکدراون و وەکو نموونە باسی شارەکانی ورمێ و مهابادی کرد و بە ئاماژەدان بەوەی لە مهاباد لەدایکبووە و لە ورمێ گەورە بووە، گوتی: "کاتێک دەبینم مهابادیان وا لێکردووە، مێشکم تێکدەچێ. شارێکی دیکە بوو، بەڵام ئێستا کردوویانەتە شتێکی دیکە".
سەرۆککۆماری ئێران هەروەها لەبارەی ورمێ گوتی: "سەردەمێک بە ورمێ دەگوترا پاریسی ئێران، بەڵام ئێستا خەریکە وەکو ئەفغانستانی لێ دەکرێت".
رەخنەکانی سەرۆککۆماری ئێران لەبارەی تێکدانی شێوازی بیناسازی و سروشت و ژینگەی شارەکان بوو و پلانی پەرەپێدان و گەشەسەندنی شارەکانی بە نەگونجاو دانا لەگەڵ شێواز و سروشتی شارەکان.
سەرۆککۆماری داوای هاوکاری لە شارەزایان و مامۆستایانی زانکۆ کرد بۆ دانانی پلانێکی گشتگیر بۆ گەشەپێدانی شارەکانی ورمێ، مهاباد، خۆی، ماکۆ و بۆکان تاوەکو نەخشەیەکی گەشەپێدانی روونیان هەبێت و هەر بەڕێوەبەر یان بەرپرسێک نەتوانێ بە خواست و دڵی خۆی، پلانی گەشەپێدان و فراوانکردنیان دابنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ