رووداو دیجیتاڵ
لەسەر داوای حکومدراوان، بڕیارە کاتی نیشتمانی بۆ زیندانیانی چاکسازییەکانی هەرێمی کوردستان دەربهێندرێت.
ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان، ئەمڕۆ سێشەممە بە تۆڕی میدیایی رووداوی گوت: "بەشێکی زۆری حوکمدراوان تاوەکو ئێستا کارتی نیشتمانییان نییە و ناتوانن هیچ مامەڵەیەکی یاسایی بە پێناسی باری شارستانی بکەن".
بەگوێرەی ئاماری چاکسازییەکانی هەرێمی کوردستان بۆ رووداو، ئێستا 5 هەزار و 710 حوکمدراو لە چاکسازییەکانی هەرێمی کوردستانن.
بەڕێوەبەری گشتیی چاکسازییەکان دەڵێت: "بە هاوکاری لەگەڵ بەڕێوەبەری گشتیی رەگەزنامەی هەرێمی کوردستان، لەگەڵ بەغدا لەسەر هێڵین و رەزامەندی وەرگیراوە، لە رێگەی لیژنەوە سەردانی چاکسازییەکان دەکرێت و هەر لە زینداندا کارتی نیشتمانی بۆ حکومدراوان دەردەهێندرێت".
ئێستا لە عێراق و هەرێمی کوردستان فۆڕمی بەشەخۆراکی مانگانە دەکرێتە ئەلیکترۆنی، بۆ ئەوەش دەبێت هەموو کەسێک کارتی نیشتمانی هەبێت و بەپێچەوانەوە بەشەخۆراکەکەی دەبڕدرێت، یەکێک لە ئامانجی حوکمدراوان نەبڕینی بەشەخۆراکەکەیانە.
لە هەرێمی کوردستان شەش چاکسازیی هەن؛ دوو لە هەولێر، دوو لە سلێمانی و دووانەکەی دیکەش لە دهۆک.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ