وێنەی دوو تۆمەتبارەکە دوای دەستگیرکردنیان لەلایەن ئاسایشی سلێمانییەوە
رووداو دیجیتاڵ
ئاسایشی سلێمانی رایدەگەیێنێت، دوو کەسیان دەستگیر کردووە بە تۆمەتی "هەڵخەڵەتاندن، هەڕەشەکردن و زۆرلێکردنی ئافرەتان بۆ کاری بەدڕەوشتی و جادوو و نووشتە کردن."
بەڕێوەبەرایەتیی ئاسایشی پارێزگای سلێمانی رایگەیاندووە، بە تۆمەتی ھەڕەشەکردن لە ئافرەتان و فێڵکردن و جادوو کردن، دوو تۆمەتباریان دەستگیر کردووە و رووبەڕووی یاسایان دەکەنەوە.
بەپێی راگەیێندراوەکەی ئاسایشی سلێمانی، رۆژی 13-04-2023 لەناو شاری سلێمانیدا، توانیویانە تۆمەتباران "ا. ا. ف" لەدایکبووی ساڵی 1975 و "د. ع. م" لەدایکبووی ساڵی 1985 دەستگیر بکەن بە تۆمەتی "ھەڵخەڵەتاندن و فریودان و ھەڕەشەکردن لە ئافرەتان و زۆرلێکردنیان بۆ کاری بەدڕەوشتی و جادوو و نووشتە کردن."
وەکو ئاسایشی سلێمانی دەڵێت، "چەندین ئافرەت بوونەتە قوربانیی [ئەو دوو تۆمەتبارە] و لەژێر ھەڕەشەدا بەکاریانهێناون، دوای گەڵاڵە بوونی زانیاریی تەواو و وەرگرتنی بڕیاری دادوەر، بەپێی مادەی 2ی خراپ مامەڵە کردن بە ئامێرەکانی پەیوەندی و دەستدرێژی بۆسەر ئافرەتان و جادوو كردن، تۆمەتباران دەستگیرکران."
هاوکات دەست بەسەر "چەکێکی جۆری ئێم فۆڕ، دوو دەمانچە، چەندین چەقۆ و خەنجەر، بڕێک پارەی ساختە، چەندین پەرتووک بۆ فێربوونی دوعا و نووشتە، مەوادی نوشتە و جادوو"دا گیراوە. ئێستاش لێکۆڵینەوە لە دۆسیەکە بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ