وێنەکە لە ڤیدیۆیەکدا وەرگیراوە کە تێیدا دەردەکەوێت تۆمەتبارەکان بە 50 دەمانچەوە دەستگیر کراون
رووداو دیجیتاڵ
گوتەبێژی ناوچەی یەکی هێزەکانی پاسەوانی سنوور ئەمڕۆ دوو کەسی ئێرانییان دەستگیر کردووە کە ویستوویانە 50 دەمانچە و 100 فیشەکدان لە عێراقەوە ببەن بۆ نێو ئێران.
رۆژی چوارشەممە، 26-07-2023، عەقید کاروان خۆشناو، گوتەبێژی ناوچەی یەکی پاسەوانی سنوور بە تۆڕی میدیایی رووداوی راگەیاند، "مەفرەزەیەکی فەوجی سێی سرییەی چواری لیوای 1ـی هێزەکانی پاسەوانی سنوور دوو کەسی ئێرانییان دەستگیرکرد، کە لە هەوڵی بەزاندنی سنوورەکانی نێوان عێراق و هەرێمی کوردستان بوون، ئەو دوو کەسە دەیانویست بە قاچاخ چەک و تەقەمەنی لە عێراقەوە ببەنە ئێران و لەکاتی دەستگیرکردنیاندا دەستبەسەر 50 دەمانچە و 100 فیشەکدان گیراوە."
عەقید کاروان خۆشناو گوتی، "ئەو دوو کەسە بەپێی رێکارەکان رادەستی لایەنی بەرپرس کران بۆ ئەوەی رێوشوێنە یاساییەکانیان بەرامبەر بگیرێتەبەر."
ئێران ماوەیەکی زۆرە گلەیی و نیگەرانییەکانی گەیاندووەتە لایەنی عێراقی و بەرپرسانی هەرێمی کوردستان و باسی بەزاندنی سنوورەکانی هەردوولا دەکات، عێراقیش ماوەیەکە کار بۆ تۆکمەکردنی زیاتری سنوورەکانی لەگەڵ هەریەک لە ئێران و تورکیا دەکات. بۆ ئەم مەبەستەش بەنیازە هێزەکانی پاسەوانی سنوور زیاد بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ