دانا عەبدولکەریم، وەزیری ئاوەدانکردنەوە و نیشتەجێکردنی هەرێمی کوردستان
رووداو دیجیتاڵ
وەزیری ئاوەدانکردنەوە و نیشتەجێکردنی هەرێمی کوردستان رایگەیاند، دابەشکردنی یەکەکانی نیشتەجێبوون بەسەر هەژار و کرێنشیناندا لە قۆناخی کۆتاییدایە.
ساڵی 2023 وەزارەتی ئاوەدانکردنەوە و نیشتەجێکردنی هەرێمی کوردستان پڕکردنەوەی فۆڕمی بۆ وەرگرتنی یەکەی نیشتەجێبوون لە رێگەی ئۆنلاینەوە راگەیاند و، تاوەکو 01-02-2024 پڕکردنەوەی فۆڕمەکە بەردەوام بوو.
نزیکەی 60 هەزار کەس فۆڕمی وەرگرتنی یەکەکانیان پڕکردبووەوە، بەڵام نزیکەی 26 هەزاریان کۆدیان بۆ گەڕاوبووەوە و فۆڕمەکەیان پەسندکرا.
ئەمڕۆ سێشەممە، 28-1-2025، دانا عەبدولکەریم، وەزیری ئاوەدانکردنەوە و نیشتەجێکردنی هەرێمی کوردستان بە تۆڕی میدیایی رووداوی راگەیاند، "ناوەکانمان یەکلایی کردوونەتەوە و ناردوومانن بۆ ئیدارەی پارێزگا، قەزا و ناحییەکان بۆ ئەوەی راستاندنیان بۆ بکرێت و دڵنیابینەوە لەوەی سوودمەند نەبوون."
دانا عەبدولکەریم گوتیشی "ئەگەر ناوەکانمان بەدەست گەیشتەوە، بەدڵنیاییەوە گرێبەست لەگەڵ ئەو هاونیشتمانییانە دەکرێت کە ناوەکانیان دەرچووە."
وەزیری ئاوەدانکردنەوە دەڵێت: "ئێمە ئەوەمان یەکلایی کردووەتەوە کە کێ (یەکەی نیشتەجێبوون) وەردەگرێت، بەڵام دەبێ یەکە کارگێڕییەکان راستاندنی بۆ بکەن."
لەبارەی پرۆژەکان و دەستپێکردنەوەشیان، دانا عەبدولکەریم گوتی "تاوەکو ئێستا حکومەتی عێراق یەک دیناری لە بودجەی وەبەرهێنان (ساڵانی 2023، 2024 و 2025) بۆ هەرێمی کوردستان نەناردووە، ئێمە بەشێک لە پرۆژەکانمان بەو هۆیەوە وەستاندووە، بەڵام چەندین پرۆژەی دیکەش تەواو کراون و دەکەین."
بە گوتەی دانا عەبدولکەریم لە چوار ساڵی رابردوودا؛ زیاتر لە 594 پرۆژە بە گوژمەی زیاتر لە یەک تریلیۆن دینار تەواو کراون و زیاتر لە 300 کم رێگەی دووساید و 1280 کم رێگەی یەک ساید دروستکراون، رێگەی زیاتر لە 250 گوندیش قیرتاو کراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ