رووداو دیجیتاڵ
بە بڕیاری دادگەی ئێشکگری ئامەد، ئەو 11 هاندەرەی یانەی ئامەدسپۆر کە لە یاریی نێوان "ئامەدسپۆر-دەنیزلی سپۆر" بە پاساوی رێزنەگرتن لە سروودی نیشتمانیی تورکیا دەستبەسەرکرابوون، بە مەرج ئازاد کران.
ئەو 11 کەسە رۆژی یەکشەممە، 27ـی ئابی 2023 لە یاریگەی ئامەدسپۆر دەستبەسەرکران و گوازرانەوە "ناوەندی پۆلیسی عەلیشان" و شەوی رابردوو لەو ناوەندە مانەوە.
دوای کۆتاییهاتنی لێکۆڵینەوەی پۆلیس، ئەو 11 کەسە رەوانەی دادگەی ئێشکگری ئامەد کران و بەرەبەیانی ئەمڕۆ (سێشەممە، 29ـی ئاب) بە مەرجی دادوەری ئازادکران.
کاژێر 20:00ـی رۆژی یەکشەممە یارییەکانی خولی پلە دووی تورکیا دەستیانپێکرد و، یانەی ئامەدسپۆر لە یەکەم یارییدا لە رکابەرییەکانی کۆمەڵەی سووری خولەکەدا بەرامبەر یانەی دەنیزلی سپۆر یارییکرد و بە دوو گۆڵی بێبەرامبەر، یارییەکەی بردەوە.
بەر لە دەستپێکردنی یارییەکە، سروودی نیشتمانیی تورکیا لێدرا، پۆلیسی ئامەد بەبیانووی ئەوەی لەکاتی لێدانی سروودەکەدا هەڵنەستابوونەوە، 11 هاندەری یانەکە دەستبەسەرکردن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ