رووداو دیجیتاڵ
گوتەبێژی بەڕێوەبەرایەتیی پۆلیسی پارێزگای دیالە رایگەیاند، ئەمشەو چەکدارانی داعش لە نزیک گوندی عیمرانییە لە ناحیەی وەجیهیەی پارێزگاکە، بە دانانەوەی بۆمب و قەنناس هێرشیان کردووەتە سەر ئۆتۆمبێلێک و دوو کەس کوژراون.
بەپێی زانیارییەکانی رووداو، نزیکەی 10 کەس لەو رووداوە کوژراون و بریندارن، بەڵام سەرچاوەیەکی ئەمنیی پارێزگاکە دەڵێت "لە رووداوەکەدا زیاتر لە 27 کوژراو و بریندار هەن."
شەوی پێنجشەممە، 30-11-2023، عەقید هەیسەم جبووری، گوتەبێژی بەڕێوەبەرایەتیی پۆلیسی پارێزگای دیالە بە تۆڕی میدیایی رووداوی راگەیاند" کاژێر 9:30ـی ئەمشەو لە نزیک گوندی عیمرانییەی ناحیەی وەجیهیە، چەکدارانی داعش بۆمبێکی چێندراویان بە ئۆتۆمبێلێکدا تەقاندەوە و دوای کۆبوونەوەی خەڵکی، بە نیشانشکێن (قەنناس) هێرشیان کرد و تاوەکو ئێستا ژمارەیەک کوژراو و بریندارمان هەن."
گوتیشی،" بەشێک لەو کەسانەی کوژراون کەسوکاری پەرلەمانتارێکی عێراقن بەناوی سەلاح زێن تەمیمی."
بەپێی زانیارییەکانی رووداو، ئەمشەو لە ناحیەی وەجیهیەی قەزای میقدادیە پۆلیس و هێزە ئەمنییەکان کەوتوونەتە دۆخی ئامادەیی و مەترسی هەیە چەکدارانی داعش هێرشی دیکە بکەن.
بەپێی سەرچاوەیەکی ئەمنی لە پارێزگای دیالە کە بە تۆڕی میدیایی رووداوی راگەیاندووە، قوربانییانی رووداوەکە زیاتر لە 25 کەس دەبن، لەنێویاندا 10 کوژراو و 17 بریندار هەن.
بەپێی زانیارییەکان ئەو گوندە کەسوکاری پەرلەمانتارە عێراقییەکەی تێدایە و بریندارانی رووداوەکە گەیێندراونەتە نەخۆشخانەی میقدادیە بۆ ئەوەی چارەسەریان بۆ بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ