رووداو دیجیتاڵ
وەزیری دەرەوەی ئێران رایگەیاند، سەڕەرای هێرشەکانی ئەمریکا و ئیسرائیل، "پشتیوان بە خودا بەهێزەوە بەردەوام دەبین و دوژمنانمان ناچار دەکەین کە دان بە هێزی گەلی ئێراندا بنێن."
رۆژی هەینی، 13ی ئاداری 2026، رۆژی جیهانیی قودس لە تاران و شارەکانی دیکەی ئێران بەڕێوەچوو. عەباس عێراقچی، وەزیری دەرەوەی ئێرانیش لە تاران بەشداری لە رێپێوانە جەماوەرییەکەدا کرد و لەبارەی هێرشەکانی ئەمریکا و ئیسرائیل بۆ سەر ئێران و بەڕێوەچوونی رۆژی قودس لە ژێر کاریگەریی جەنگدا قسەی کرد.
عەباس عێراقچی رایگەیاند: "ئەمڕۆ رۆژی قودسە لە ئێران و سەرەڕای هێرشە دڕندەکانی رژێمی زایۆنی و ئەمریکا، ئێمە رووبەڕووی ئامادەبوونی بە ملیۆنان کەس لە گەلی ئێران، چ لە تاران و چ لە شارەکانی دیکە بووینەتەوە و ئەمەش پێشاندەری ئیرادە و ویستی پتەوی ئێرانییەکانە بۆ پشتگیری لە کۆماری ئیسلامی، بۆ پشتیوانی لە قودس، بۆ پشتیوانی لە فەلەستین و هەموو ئەو ئامانجە نەتەوەییانەی کە لەم ساڵانەدا هەمانبووە و ئێمەیان گەیاندووەتە ئێستا."
عێراقچی دەڵێت:"،پشتیوان بە خودا بەهێزەوە بەردەوام دەبین و دوژمنانمان ناچار دەکەین کە دان بە هێزی گەلی ئێراندا بنێن."
سەبارەت بە بەرزبوونەوەی نرخی نەوتیش لە بازارەکانی جیهان، وەزیری دەرەوەی ئێران رایگەیاند: "نرخی نەوت روو لە زیادبوونە و ئەمەش ئەنجامی کردەوەکانی ئەمریکا و ئیسرائیلە لە ناوچەکەدا. ئەوانن کە ئەم بەڵایەیان بۆ ناوچەکە دروست کردووە و دەبێ وەڵامدەر دەبن."
ئەو لێدوانەی وەزیری دەرەوەی ئێران لە کاتێکدایە جەنگی ئیسرائیل-ئەمریکا لەگەڵ ئێران پێی ناوەتە 14ـیەم رۆژەوە و تاوەکو ئیستا بەردەوامە.
لە بەرەبەیانی رۆژی شەممە 28ـی شوباتەوە، هێرشێکی بەرفراوان و هاوبەشی ئیسرائیل و ئەمریکا بۆ سەر ئێران دەستیپێکردووە. لە بەرامبەردا، هێزە چەکدارەکانی ئێران و بەتایبەت سوپای پاسداران، بە چەندین مووشەک و درۆن هێرشیان کردووەتە سەر ئیسرائیل و وڵاتانی ناوچەکە.
رۆژی جیهانیی قودس، بۆنەیەکی فەرمییە لە رۆژژمێری کۆماری ئیسلامی ئێراندا، ساڵێک دوای شۆڕشی گەلانی ئێران و سەرکەوتنی کۆماری ئیسلامی ، لە رۆژی 7ی ئابی 1979ی زاینی بە فەرمانی ئیمام خومەینی، دامەزرێنەری کۆماری ئیسلامیی ئێرانەوە دیاریکراوە و ساڵانە وەکو پشتگیرییەک بۆ گەلی فەلەستین و بەمەبەستی یەکگرتووی زیاتری جیهانی ئیسلامی لە بەرامبەر ئیسرائیل بەڕێوەدەچێت.
بۆنەکە دەکەوێتە دوایین هەینیی مانگی رەمەزان و ساڵانە لە ئێران و چەندین وڵاتی جیهان گردبوونەوە و خۆپێشاندان بۆ پشتگیری لە خەڵکی فەلەستین و سەرکۆنەکردنی ئیسرائیل بەڕێوەدەچن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ