رووداو دیجیتاڵ
بەڕێوەبەرایەتیی کشتوکاڵی ئەنبار رایگەیاند، زیاتر لە نیو ملیۆن ماسییان خستووەتە دەریاچەی بەنداوی حەدیسە؛ هاوکات بەرپرسێکی کشتوکاڵی کەرکووکیش دەڵێت، لە چوارچێوەی هەمان پلاندا 500 هەزار ماسی دیکە دەخرێنە نێو دەریاچەکانی پارێزگای کەرکووک.
دکتۆر وەلید رزوقی، بەڕێوەبەری سامانی ئاژەڵ لە وەزارەتی کشتوکاڵی عێراق، رۆژی پێنجشەممە، 21-05-2026، بە رووداوی راگەیاند: "بۆ زیادکردنی سامانی ماسی و بەهێزکردنی ئاسایشی خۆراک لە پارێزگاکانی عێراق ئەم هەڵمەتەمان دەستپێکردووە."
هەڵمەتەکەی پارێزگای ئەنبار لەلایەن بەشی خزمەتگوزارییەکانی سامانی ئاژەڵ، بە هاوئاهەنگی لەگەڵ لقی کشتوکاڵی حەقلانییە و لیژنەی ناوەندی جێبەجێ کراوە. ئەو ماسییانەی خراونەتە نێو دەریاچەی حەدیسەوە لە جۆرەکانی (کارپی ئاسایی، کارپی زیوینی، شەبووت و بننی عێراقی) پێکهاتوون.
لە لایەکی دیکەوە، هاشم محەممەد، بەڕێوەبەری سامانی ئاژەڵ لە بەڕێوەبەرایەتیی کشتوکاڵی کەرکووک، بە رووداوی گوت: "وەزارەتی کشتوکاڵ بەپێی پلانێکی ماسی دەنێرێت بۆ پارێزگاکان، لەو پلانەشدا پارێزگای کەرکووک هەیە و بڕی 500 هەزار ماسی دەخرێنە نێو دەریاچەکانەوە."
بەڕێوەبەری سامانی ئاژەڵی کەرکووک ئاماژەی بەوەش کرد، ئەوان خۆیان شوێنی ماسییەکان دیاری دەکەن و گوتی: "ئەم پڕۆسەیە دەریاچەکانی بەنداوی دووبز، دەریاچەی پردێ، دەریاچەی بەنداوی خاسە و زاب دەگرێتەوە."
ئەو ماسییانەی خراونەتە دەریاکانەوە، لە تەمەنی جیاوازدا بوون (پەنجەماسی و ماسیی بچووک) و لە تاقیگەی ماسیی "سوێرە"ی سەر بە فەرمانگەی سامانی ئاژەڵ بەرهەم هێنراون.
وەزارەتی کشتوکاڵی عێراق دەڵێت، ئەم هەنگاوە لە چوارچێوەی هەوڵە بەردەوامەکانی وەزارەتی کشتوکاڵدایە بۆ پەرەپێدانی سامانی ماسی لە رووبار و دەریاچەکاندا، کە رۆڵی دەبێت لە بوژانەوەی ئابووریی نێوخۆیی و دابینکردنی پێویستییەکانی هاووڵاتاین بۆ بەرهەمی ماسی لە سەرانسەری عێراقدا.
بەگوێرەی راپۆرتێکی فەرمانگەی لێکۆڵینەوە و توێژینەوەکانی پەرلەمانی عێراق، بڕی بەرهەمهێنانی ماسی لە عێراق (ساڵی 2020 تاوەکو ساڵی 2025) بەم شێوەیە بووە:
ساڵی 2020
75 هەزار تۆن
ساڵی 2021
96 هەزار تۆن
ساڵی 2022
56 هەزار تۆن
ساڵی 2023
22 هەزار تۆن
ساڵی 2024
45 هەزار تۆن
نیوەی یەکەمی ساڵی 2025
31 هەزار تۆن
ژمارەی حەوزەکان و توانای بەرهەمهێنانیان:
حەوزی ماسیی عێراق (حکومی): 4 حەوز، کە توانای بەرهەمهێنانی ساڵانەیان 21 ملیۆن ماسییە.
سوەیرە لە واست، شەرش و مەیمونە لە مەیسان، شوش لە بەسرە.
حەوزی ماسیی عێراق (کەرتی تایبەت): 26 حەوز، کە توانای بەهەمهێنانی ساڵانەی 44 ملیۆن ماسییە.
لە پارێزگاکانی (بەغدا، دیوانییە، بابل، واست و میسان)ن
هەروەها حەوزی قوڕینی ماسی، کە یەکێکە لەو رێگە باوانەی لە عێراق بۆ بەخێوکردنی ماسی بەکاردێت.
ژمارەی مۆڵەتپێدراوانی پڕۆژەکانی بەخێوکردنی ماسی لە حەوزە قوڕینەکان:
نیوەی یەکەمی 2025
1105 حەوزی قوڕ
بڕی بەرهەمهێنانی ماسی:
نزیکەی 27,285 تۆن
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ