قاوەخانەی رۆمیۆ و جولێت و فیچەری دیکەی جیاواز

چیرۆکی رامان چاچان لە زانکی شام


رامان ئەحمەد و چاچان، دوو گەنجی کوردی خەڵکی قامشلۆن، لە شاری دیمەشقی پایتەختی سووریا درێژە بە خوێندنی زانکۆ دەدەن. رامان، تەمەن 21 ساڵ و خوێندکاری بەشی تەکنەلۆژیای زانیارییە، چاچانیش، لە هەمان تەمەندایە و لە کۆلێژی پزیشکی دەخوێنێت. ئەوەی ئەم دوو گەنجەی کۆکردووەتەوە، تەنیا خوێندن نییە، بەڵکوو خولیای هاوبەشیانە بۆ میوزیک و گۆرانیگوتن، کە لەنێو سەرقاڵییەکانی خوێندن و دوورەوڵاتیدا، بووەتە سەرچاوەی ئارامییان.

رامان و چاچان، لەڕێگەی ئامێرەکانی گیتار و سازەوە ئاواز دادەنێن و خاوەنی دەنگێکی تایبەت و پڕ هەستن. ئەوان دەڵێن، "کاتێک مرۆڤ لە خاک و ماڵباتەکەی دووردەکەوێتەوە، هەست بە تەنیایی دەکات، بەڵام میوزیک ئەو بۆشاییەمان بۆ پڕدەکاتەوە." ئامانجی ئەم دوو گەنجە ئەوەیە کە دوای تەواوکردنی خوێندنیان، لە ئەکادیمیا نێودەوڵەتییەکاندا بەهرە مۆسیقییەکانیان پەرەپێبدەن و دەنگی مۆسیقای کوردی بە جیهان بناسێنن.

یادگاری لینکۆڵن؛ هێمای یەکگرتوویی و ئازادی لە واشنتن

لە ناوەندی واشنتنی پایتەختی ویلایەتە یەکگرتووەکانی ئەمریکا، یادگاری ئابراهام لینکن، 16یەمین سەرۆکی وڵاتەکە، وەکو یەکێک لە دیارترین هێما مێژووییەکان دەبینرێت. ئەم یادگارە کە لە ساڵی 1922 لەلایەن ئەندازیار هێنری بەیکنەوە دیزاین کراوە، تەنیا پەیکەرێکی گەورە نییە، بەڵکوو سیمبولی کۆتاییهێنان بە کۆیلایەتی و پاراستنی یەکگرتوویی ئەمریکایە لە سەردەمی شەڕی ناوخۆدا.

ئەم شوێنە مێژووییە، شاهیدی چەندین رووداوی گرنگ بووە، لەوانە خۆپێشاندانی دژی رەگەزپەرستی لە ساڵی 1925 و گوتارە مێژووییەکەی مارتن لۆسەر کینگ لە ساڵی 1963 بەناونیشانی "من خەونێکم هەیە." ساڵانە ملیۆنان گەشتیار لە سەرانسەری جیهانەوە روو لەم یادگەیە دەکەن بۆ بینینی پەیکەری ئەو سەرکردەیەی کە وێنەکەی لەسەر دراوی 5 دۆلاری نەخشێندراوە و بە داڕێژەری ئەمریکای مۆدێرن دادەنرێت. بە بڕوای مێژوونووسان، ئەگەر لینکن نەبووایە، ئەمریکا بەم شێوەیەی ئێستای نەدەبوو.

قاوەخانەی رۆمیۆ و جولێت لە مێردین

لە شاری مێردینی باکووری کوردستان، قاوەخانەیەک بە ناوی "رۆمیۆ و جولێت" سەرنجی گەشتیارانی بەلای خۆیدا راکێشاوە. تایبەتمەندیی ئەم شوێنە لەوەدایە کە میوانەکان دەتوانن بە ئارەزووی خۆیان فنجانی قاوەکانیان هەڵبژێرن. ئەردەڵ تۆپەڕ، خاوەنی قاوەخانەکە، ئاماژە بەوە دەکات کە ئەم پیشەیە لە باوباپیرانییەوە بۆی ماوەتەوە، کە کاریان کڕین و فرۆشتنی کەلوپەلی کۆن بووە.

لە قاوەخانەکەدا، دەیان فنجانی ئەنتیکە و دەگمەن نمایشکراون کە مێژووەکەیان بۆ 50 تاوەکو 150 ساڵ لەمەوبەر دەگەڕێتەوە و لە وڵاتانی ئەڵمانیا، بەریتانیا و ئیسپانیاوە هێنراون. نرخەکانیان جیاوازە و بەهای هەندێکیان دەگاتە 6 هەزار لیرەی تورکی. سەردانکەران، بەتایبەتی گەنجان و گەشتیاران، تەنیا بۆ خواردنەوەی قاوە سەردانی ناکەن، بەڵکوو بۆ ئەزموونکردنی هەستێکی نۆستالژی و بینینی تابلۆ و فینجانە دێرینەکان روو لە "رۆمیا و ژۆ" دەکەن، تاوەکو لە دڵی مێژوویی مێردیندا، تام لە مێژوو بکەن.
بەرنامەی "چاوی رووداو" هەموو هەفتەیەک لەسەر شاشەی تۆڕی میدیایی رووداو پێشکێش دەکرێت.