لە گوندی بارێی بچووک دوو هاوژینی بەتەمەن بە تەنیا دەژین

گوندی شەروێت؛ نیشتمانی کانی و قەل و قازە خۆماڵییەکان

 
گوندی شەروێت، کە دەکەوێتە بناری چیای قەندیل و 10 کیلۆمەتر لە شارۆچکەی ژاراوە دوورە، بە سروشتە جوانەکەی و هاژەی کانی و کارێزەکانی ناسراوە. ئەوەی ئەم گوندەی لە گوندەکانی دیکە جیا کردووەتەوە، ناوبانگی قاز و مراوییە خۆماڵییەکانییەتی. دانیشتووانی گوندەکە دەڵێن، قازەکانیان تەنیا گەنم و گیا و دانەوێڵەی سروشتی دەخۆن و هیچ جۆرە ئالیکێکی دەستکردیان پێنادرێت، ئەمەش وای کردووە گۆشتەکەیان تامێکی تایبەتی هەبێت.
ئێستا لە شەروێت بازاڕی فرۆشتنی قاز گەرمە و نرخی هەر کیلۆگرامێک گۆشتی قاز گەیشتووەتە 13 هەزار دینار. سەرەڕای وشکەساڵیی ساڵانی رابردوو، بەهۆی بووژانەوەی سەرچاوە ئاوییەکان، ژیان بۆ ئەم گوندە و پەلەوەرەکانی گەڕاوەتەوە و بووەتە سەرچاوەیەکی گرنگی بژێوی بۆ زیاتر لە 100 خێزانی نیشتەجێی گوندەکە.

خێزانێکی بەعاج لە چیاکانی دهۆک ئاژەڵداری دەکەن

 
محەممەد عەواد، هاووڵاتییەکی خەڵکی قەزای بەعاجی سەر بە پارێزگای نەینەوایە، بەڵام ماوەی 5 ساڵە لەگەڵ خێزانەکەی لە هەرێمی کوردستان نیشتەجێ بووە. ئەم خێزانە ژیانێکی سادەی کۆچەرییان هەڵبژاردووە و لەنێو خێوەتدا دەژین. کاریان بەخێوکردنی مەڕ و ماڵاتە، کە پیشەیەکی باوباپیرانیانە و هەموو ئەندامانی خێزانەکە، لە بچووکەوە تاوەکو گەورە، تێیدا بەشدارن.
محەممەد، دەڵێت: "بەیانیان کاژێر 6 دەست بە کار دەکەین، ئالیک بە مەڕەکان دەدەین و پاشان دەیاندۆشین." ئەوان شیرەکە کۆ دەکەنەوە و رەوانەی کارگەیەکی شیرەمەنیی لە دهۆک دەکەن. خێزانەکە باس لەوە دەکەن کە لە هەرێمی کوردستان هەست بە ئارامی و ئاسوودەیی دەکەن و سەرەڕای سەختییەکانی وەرزی زستان و بەفربارین، لەسەر کارەکەیان بەردەوامن.

بارێی بچووک؛ چیرۆکی عەشق و مانەوە لەنێو بەفری شارباژێڕدا

 
لە گوندی بارێی بچووک لە سنووری شارباژێڕ، دوو هاوژینی بەتەمەن بە تەنیا دەژین. لە کاتێکدا زۆربەی دانیشتووانی گوندەکە لە زستاندا روو لە شار دەکەن، ئەم دوو هاوژینە بڕیاریان داوە لە زێدی خۆیان بمێننەوە. ئەوان بە عەشق و تەباییەکی زۆرەوە پێکەوە کار دەکەن؛ مەڕ و مانگا دەدۆشن و ئاگاداری ماڵ و پەلەوەرەکانیان دەبن.

خانمەکە دەڵێت "نە من بێ ئەو دەتوانم و نە ئەویش بێ من؛ ئێرە بۆ ئێمە لە شار خۆشترە." شەوان لە دەوری سۆپای دار دادەنیشن، چای گەرم دەخۆنەوە و باسی یادگارییەکانی منداڵییان دەکەن. ئەگەرچی رێگەی گوندەکەیان بەهۆی بەفرەوە دادەخرێت و هەندێکجار کارەبایان نامێنێت، بەڵام گەرموگوڕیی نێوانیان، سەرمای زستانی شارباژێڕیانی لەبیر بردووەتەوە.

ڤەداد کیان؛ هونەرمەندێک بەبێ دەست تابلۆ دەنەخشێنێت

 
چیرۆکی ڤەداد کیان، چیرۆکێکی جیاواز و پڕ لە ئیرادەیە. ڤەداد، گەنجێکی نیگارکێشە کە لەدایکبوونەوە دەستی نییە، بەڵام ئەمە نەبووەتە رێگر لەبەردەم خەونەکانیدا. ئەو تابلۆگەلێکی ئەوەندە جوان دەکێشێت کە بینەر سەرسام دەکات. ڤەداد ئێستا قوتابییە لە بەشی شێوەکاری لە زانکۆ و ناوبانگێکی زۆری پەیدا کردووە.
ڤەداد، باس لەوە دەکات کە لە منداڵییەوە حەزی لە وێنەکێشان بووە و سەرەڕای هەموو قسە و ساردکردنەوەکان، کۆڵی نەداوە. ئەو دەڵێت: "فڵچەی وێنەکێشان بووەتە پەنجەکانی دەستم." ڤەداد دەیەوێت لە رێگەی رەنگ و تابلۆکانییەوە بە جیهان بڵێت کە مرۆڤ بە ئیرادە دەتوانێت هەموو ئەستەمێک تێک بشکێنێت. ئێستا تابلۆکانی لەلایەن خەڵکەوە داواکارییەکی زۆریان لەسەرە و بووەتە سیمبولی خۆڕاگری.

بەرنامەی چاوی رووداو، هەموو هەفتەیەک رۆژانی هەینی کاژێر 18:00  پێشکێش دەکرێت