لە کفرییەوە بۆ تبلیسی؛ چوار چیرۆکی جیاوازی هونەر و پاراستنی کەلەپوور

لە کفری، خانمێک بە ناوی بۆکان ئەمین، دوای تەواوکردنی دەوامی فەرمیی لە زانکۆ، دەست دەداتە خۆڵ و قوڕ بۆ دروستکردنی تەنوور، کە پیشەیەکە لە دایکییەوە بۆی ماوەتەوە و نایەوێت لەناو بچێت.

بۆکان، کە لەگەڵ دایکیدا دەژی، باسی نهێنیی تەنوورەکانی دەکات و دەڵێت: "خۆڵی ئەم تەنوورانە جیاوازە و لە گوندی دوانزە ئیمامەوە دەیهێنین، چونکە هەموو خۆڵێک بۆ تەنوور نابێت." پرۆسەی دروستکردنەکە سێ رۆژ دەخایەنێت و پێویستی بە وردەکاریی زۆرە، لە بژارکردنی خۆڵەکەوە تاوەکو تێکەڵکردنی لەگەڵ کا و "شەو و رۆژێک" پێگەیشتنی قوڕەکە.

ناوبانگ و پاکیی تەنوورەکانی بۆکان وای کردووە کە لە زۆربەی شارەکانی کوردستانەوە، وەکو سلێمانی، رانیە و دەربەندیخان، کڕیاری هەبێت. ئەو دەڵێت: "خەڵک هەیە تەنووری هەیە، بەڵام نانەکەی خۆڵاوی دەکات، ئێمە بە مەرج تەنووریان پێ دەدەین کە نانەکەی پاک و بێگەرد بێت."
بۆکان، شانازی بەم کارەوە دەکات و دەڵێت: "حەز دەکەم ئەمە وەکو کولتوورێک بمێنێتەوە و تاوەکو خۆم بمێنم، ناهێڵم لەناو بچێت، دوای خۆشم خوشکەکانیشم فێر دەکەم."

وەلی باڵتاچی؛ دەنگێکی خۆش لە ئامەدی باکووری کوردستان

لە شاری ئامەدی باکووری کوردستان، وەلی باڵتاچی، گەنجێک کە بەشی سینەمای خوێندووە و وەکو کامێرامان لە دەزگایەکی میدیایی کار دەکات، لەنێو ژاوەژاوی کارەکەیدا، بە دەنگە زوڵاڵەکەی ئارامی بە هاوڕێکانی دەبەخشێت.

هاوڕێکانی وەلی، باس لەوە دەکەن کە ئەو لە کاتی کارکردن و رووماڵکردنی هەواڵەکاندا، بە چڕینی حەیرانۆک و گۆرانی، ماندوێتییان دەڕەوێنێتەوە. وەلی خۆی دەڵێت: "لە منداڵییەوە لە سلۆپی گوێم لە گۆرانییەکانی فازڵ جزیری بووە و کاریگەرییان لەسەرم هەبووە."

ئەم گەنجە هونەرمەندە، جگە لە گوتنەوەی گۆرانیی فۆلکلۆر، خاوەنی تێکست و ئاوازی تایبەت بە خۆیەتی. یەکێک لە بەرهەمەکانی ناوی "وەرە ماڵێ"یە، کە لە نامەیەکی دەنگیی دایکییەوە ئیلهامی وەرگرتووە کاتێک لە غەریبیدا پێی گوتووە: "وەرەوە ماڵێ کوڕم، ژیانی غەریبی ناخۆشە." وەلی ئێستا سەرقاڵی بەرهەمهێنانی کلیپێکە و هیواخوازە خەونە هونەرییەکانی بەدی بهێنێت.

دکتۆر ویژدان؛ پزیشکێک بە بەردی بچووک، تابلۆی هونەریی ناوازە دروست دەکات

ویژدان رەشید، کە بە "جانۆ" ناسراوە، پزیشکێکی ددانی خەڵکی قامشلۆی رۆژئاوای کوردستانە و ئێستا لە ئەڵمانیا دەژی. ئەو، هونەرەکەی کردووەتە پردێک بۆ دڵخۆشکردنی منداڵانی پەنابەر.
جانۆ، بە بەکارهێنانی بەردی بچووک، تابلۆی هونەریی ناوازە دروست دەکات. ئەو دەڵێت: "سەرەتا وێنەی کارتۆنیم دەکێشا، دواتر بەردەکان سەرنجیان راکێشام، چونکە بوارێکی فراوانی داهێنانیان تێدایە."

لە کەمپەکانی ئەڵمانیا، ئەم پزیشکە هونەرمەندە هەفتانە وانەی وێنەکێشان بە منداڵانی پەنابەر (لەوانەش ئۆکراینی و ئەفغانی) دەڵێتەوە، تاوەکو لە خەم و ئازاری شەڕ دووریان بخاتەوە. هەرچەندە ئەڵمانیا ئارامیی پێ بەخشیوە، بەڵام ویژدان دەڵێت: "زۆر بیری مێژوو و ژیانی قامشلۆ دەکەم و چاوم لەوەیە دواجار لە کوردستان نیشتەجێ ببمەوە."

لێکۆڵەرێکی جۆرجی مێژووی کوردی گورجستان دەنووسێتەوە

لە ئەکادیمیای زانستیی جۆرجیا، مریەم گورێشیدزێ، توێژەر و مێژوونووسێکی گەنجی گورجییە کە خەریکی لێکۆڵینەوەیە لە پەیوەندییە مێژووییەکانی نێوان کورد و گورجەکان.
تێزی دکتۆراکەی مریەم، لەسەر خەباتی شێخ شاملە لە قەوقاز، کە تێیدا رۆڵی کورد و تەریقەتی نەقشبەندی بە روونی دەردەکەوێت. ئەو دەڵێت: "لە مێژووی جۆرجیادا کورد رۆڵێکی گەورەی هەبووە، بەتایبەتی لە سەردەمی شاژنە تاماردا، بنەماڵە کوردییەکانی وەکو مخارگرزێلی رۆڵی یەکلاکەرەوەیان هەبووە."

توێژینەوەکانی مریەم، تەنیا لەنێو کتێبەکاندا نین، بەڵکو پەیوەندییەکی بەهێزی لەگەڵ رەوەندی کوردی لە جۆرجیا و زانکۆکانی کوردستان دروست کردووە. پڕۆفیسۆر و مێژوونووسانی گورجی، مریەم بە "پردێکی زیندوو" و درێژەپێدەری قوتابخانەی کوردۆلۆجی لە جۆرجیا وەسف دەکەن.