کچە گۆرانیبێژێکی مەهاباد و فیچەری دیکە لە چاوی رووداو دا

محەممەد عوسمانزادە، خۆشنووسی رۆژنامەگەریی کوردی 

لە ماڵێکی بچووک لە شاری هەولێر، گەلەرییەکی تایبەت بە خۆشنووس محەممەد عوسمانزادە هەیە، کە ئەرشیڤێکی دەوڵەمەندی مێژووی رۆژنامەگەریی کوردی تێدا پارێزراوە. ناوبراو، لە ساڵانی حەفتاکانی سەدەی رابردوودا، لە کاتێکدا رۆژنامەگەریی کوردی لە بەغدا رووبەڕووی کەمیی خۆشنووسی کورد ببووەوە، بووە ناسنامەی دیزاینی گۆڤار و رۆژنامە کوردییەکان.

محەممەدزادە، کە سەرەتای کارەکانی لە رۆژنامەی "هاوکاری" دەستپێکرد، دەڵێت کە بە قەڵەم و مەرەکەب مانشێتە کوردییەکانی دەنووسی. ئەو دەڵێت: "ئەو کاتە وەکو ئێستا نەبوو، هەموو شتێک بە دەست دەنووسرا؛ ئێستا کۆمپیوتەر کارەکانی ئاسان کردووە، بەڵام من توانیم ئەو نووسینە دەستییانە بگۆڕم بۆ فۆنتی کۆمپیوتەری و بەرنامەی تایبەتییان بۆ دابنێم." بە گوتەی نەجات ئەنوەر، خۆشنووسی ناسراو، محەممەدزادە یەکێکە لە دیارترین قوتابخانەکانی خۆشنووسیی کوردی و شێوازەکەی لە وڵاتانی وەکو میسر، ئوردن و تورکیا لاسایی دەکرێتەوە.

وەرزش و چالاکی رۆژانەی بەتەمەنەکانی چین

لە پەکینی پایتەختی چین، لەگەڵ هەڵهاتنی خۆر، پارکەکان پڕ دەبن لەو هاووڵاتیانەی تەمەنیان لە سەرووی 60 ساڵەوەیە. لەو وڵاتەدا، بەساڵاچوون بە مانای دانیشتن و گۆشەگیری نایەت، بەڵکو وەکو سەرەتایەکی نوێی چالاکیی جەستەیی سەیر دەکرێت، کە سەمای بەکۆمەڵ، گوتنی گۆرانیی نیشتمانی، یارییەکانی تێنسی سەرمێز، شەترەنج و وەرزشی قورس لەخۆدەگرێت.

بەپێی ئامارەکان، لە چین زیاتر لە 300 ملیۆن کەس تەمەنیان لە سەرووی 60 ساڵەوەیە. ژیانگ شو، پیاوێکی تەمەن 75 ساڵ، دەڵێت کە هەموو بەیانییەک کاژێر 07:00 لەگەڵ هاوژینەکەی سەردانی پارک دەکات بۆ یاریکردنی تێنسی سەرمێز. هاوکات، لیهوو-ی تەمەن 73 ساڵ رۆژانە 3 کاژێر راهێنانی لەشجوانی دەکات بە مەبەستی پاراستنی تەندروستیی خۆی. سۆنفوژی تەمەن 91 ساڵیش، لەناو رووبارە بەستووەکانی پەکیندا مەلە دەکات و پێیوایە ئەمە باشترین رێگەیە بۆ پاراستنی سووڕی خوێن. فەلسەفەی چینییەکان لەسەر بنەمای جووڵەی بەردەوام دامەزراوە و پارکەکان بوونەتە ناوەندێکی گرنگی کۆمەڵایەتی و وەرزشی.

دڵنیاخان؛ کچە گۆرانیبێژەکەی مەهاباد بە ستایلێکی جیاواز

دڵنیا مستەفاپوور، ناسراو بە "دڵنیاخان"، هونەرمەندێکی رۆژهەڵاتی کوردستانە کە لە تەمەنی 12 ساڵییەوە لە شاری مەهاباد دەستی بە گۆرانیگوتن کردووە. دڵنیا بەوە ناسراوە کە لە زۆربەی دەرکەوتنەکانیدا جلی کوردیی پیاوانە دەپۆشێت و پێیوایە ژنان دەتوانن لە یەک کاتدا هەم خاوەن سیما و رەفتاری ناسک بن و هەم بەهێز، هەروەها وەکو پیاوانیش جلی کوردی بپۆشن.

دڵنیا، کە ئاماژەی بە پاڵپشتیی بەردەوامی باوکی کرد، رایگەیاند: "باوکم دەیویست بە ناوی دڵنیاخان بناسرێم و ترسم بشکێت بۆ ئەوەی بتوانم لەسەر تەختەی شانۆ گۆرانییەکانم پێشکێش بکەم." دڵنیاخان ئێستا گروپێکی هونەریی تایبەت بە خانمانی پێکهێناوە کە ئەندامەکانی خەڵکی سنە، مەریوان و شارەکانی دیکەی رۆژهەڵاتی کوردستانن. دڵنیا هەوڵدەدات مۆسیقای فۆلکلۆری کوردی و سروودە نیشتمانییەکان لەگەڵ ستایلی مۆدێرن تێکەڵ بکات و پەیامی ئاشتی و کوردایەتی بگەیەنێت.

بەرنامەی چاوی رووداو، رۆژانی هەینی کاژێر 18:00 پەخش دەکرێت.