نیگەرانییە سەرەکییەکانی هاووڵاتییان لە موسڵ

ئەم ئەڵقەیەی بەرنامەی "رووداوی ئەمڕۆ" کە  نوێنەر فاتیح پێشکێشی دەکات تیشک دەخاتە سەر هەڵبژاردنەکانی ئەنجوومەنی پارێزگاکان و تێڕوانینی خەڵک بۆ بەڵێنە سیاسییەکان. بەرنامەکە زیاتر لە قسەی سیاسییەکان، گرنگیی بە گواستنەوەی دەنگی خەڵکی موسڵ و تێگەیشتن لە پێداویستی و چاوەڕوانییەکانیان دەدات.

نوێنەر فاتیح چووەتە نێو خەڵک و لەگەڵ چەند دانیشتوویێکی موسڵ قسەی کردووە بۆ وەرگرتنی بۆچوونیان لەبارەی هەڵبژاردنەکان و بەڵێنەکانی سیاسەتمەداران. لەکاتێکدا هەندێک هاووڵاتیی ئاماژەیان بە باشتربوونی دۆخی ئەمنی و جێگیربوونی شارەکە کرد، بەڵام گومان و بێهیوایی لەسەر پرۆسەی هەڵبژاردنەکان زاڵ بوو. هاووڵاتییەک گوتی: "هەمان رووخسارەکانن کە ساڵانێکە دەیانبینین، هیچ گۆڕانکارییەکی راستەقینە لە ژیانماندا روونادات." 

نیگەرانییە سەرەکییەکانی هاووڵاتییان لە چەند خاڵێکدا باسکران

هەلی کار: بەتایبەتی بۆ توێژی گەنجان، بەهۆی بێکارییەوە رووبەڕووی داهاتوویەکی نادیار بوونەتەوە و ئەمەش وایکردووە داوایەکی بەپەلە بۆ کردنەوەی دەرفەتی کاری نوێ و پڕۆژەی وەبەرهێنان هەبێت.

چاودێریی کۆمەڵایەتی: داواکاری بۆ فراوانکردن و رێکخستنەوەی پرۆگرامەکانی چاودێریی کۆمەڵایەتی هەبوو، لەگەڵ ئاماژەدان بە کێشەی گەندەڵی و حیزبایەتی لە دابەشکردنی یارمەتییەکاندا، کە زۆرجار بە کەسانی شایستە ناگات.

کەرتی کشتوکاڵ: جووتیاران باسیان لەوە کرد، بەهۆی کەمیی پاڵپشتیی حکومییەوە زیانێکی زۆریان بەرکەوتووە، بەتایبەتی لە دیاریکردنی نرخی بەرهەمەکانیان وەکو گەنم، پەتاتە و تەماتە، کە نرخەکانیان لەگەڵ تێچووی بەرهەمهێناندا ناگونجێت.

دانیشتوویێکی بەتەمەن، مووچەی چاودێریی کۆمەڵایەتییەکەی بڕدرابوو، بە نیگەرانییەوە باسی لە پێویستیی دابینکردنی پاڵپشتییە سەرەتاییەکان کرد. ئەو جەختی لەسەر ئەوە کردەوە کە سیاسەتمەداران "دەبێت ویژدانیان هەبێت" و بە کردەوە خزمەتی خەڵک بکەن، نەک تەنیا لە کاتی بانگەشەی هەڵبژاردندا بەڵێنیان پێبدەن. پەیامی سەرەکیی خەڵكی موسڵ بریتی بوو لە داواکردنی کردار، نەک بەڵێنی بێ بنەما، و پێیان وابوو نابێت دەرفەت بدرێتەوە بەو کەسانەی پێشتر تاقیکراونەتەوە و لە ئاست چاوەڕوانییەکاندا نەبوون.

لە بەشێکی دیکەی بەرنامەکەدا، نوێنەر فاتیح، میوانداریی عیسام زەنگەنە، بەربژێری یەکێتیی نیشتمانیی کوردستان لە لیستی "هاوپەیمانیی خەڵکی نەینەوا"ـی کردووە. 

زەنگەنە، روونیکردەوە کە "هاوپەیمانیی خەڵکی نەینەوا" هاوپەیمانییەکی ستراتیژیی هەڵبژاردنە لەلایەن یەکێتیی نیشتمانیی کوردستانەوە لە پارێزگای نەینەوا دامەزراوە. ئامانجی سەرەکیی هاوپەیمانییەکە کۆکردنەوەی دەنگ و بۆچوونە جیاوازەکانە لەژێر یەک چەتردا بۆ دروستکردنی بنەمایەکی بەهێز بۆ لێکتێگەیشتنی نێوان پێکهاتەکانی پارێزگاکە.

لە وەڵامی پرسیارێکدا سەبارەت بە هۆکاری دروستنەکردنی هاوپەیمانی لەگەڵ پارتی دیموکراتی کوردستان، زەنگەنە، باسی لەوە کرد کە ستراتیژی کاری یەکێتی کراوە بووە بۆ هەموو حیزب و لایەنەکان و بانگهێشتی هەموو هێزە سیاسییەکانیان کردووە بۆ گفتوگۆ، بەڵام بە گوتەی ئەو، پارتی وەڵامی ئەرێنیی بانگهێشتەکەی یەکێتیی نەداوەتەوە.

عیسام زەنگەنە، جەختی لەسەر کوردستانیبوونی ناوچەکانی مادەی 140 کردەوە و بەڵێنی دا کە لە پەرلەمانی عێراقدا کار بۆ جێبەجێکردنی بکەن و هەموو ئەو ئاستەنگانە لاببەن کە رێگر بوون لە جێبەجێکردنی. لەبارەی شنگالیشەوە، زەنگەنە، باسی لەوە کرد کە پێویستە پارێزراو بێت و کێشەکانی لەڕێگەی دیالۆگەوە لەگەڵ لایەنە پەیوەندیدارەکاندا چارەسەر بکرێن، نەک بە بەکارهێنانی چەک. ئەو جێبەجێکردنی مادەی 140ی بە تاکە زامنی ئاسایش و سەقامگیریی شنگال و ناوچەکانی دەوروبەری دانا.

لە کۆتایی بەرنامەکەدا، زەنگەنە، لە وەڵامی پرسیارێکدا سەبارەت بە گلەییەکانی پارتی دیموکراتی کوردستان، رایگەیاند، یەکێتی پێش داگیرکردنی موسڵ لەلایەن داعشەوە، پۆستی گرنگی لە نەینەوا هەبووە، بەڵام پارتی رێککەوتنەکانی پێچەوانە کردووەتەوە و پۆستە شایستەکانی یەکێتیی پێنەداوە، وەکو یاریدەدەری پارێزگاری نەینەوا و قایمقامی موسڵ. ناوبراو جەختی کردەوە کە یەکێتی خۆی لە رووبەڕووبوونەوە پاراستووە و هەوڵیداوە کێشەکان لە بەغدا چارەسەر بکات، وەکو دابینکردنی مووچەی فەرمانبەرانی هەرێمی کوردستان.