ئامادەکردنی قوڕاو بە شێوازی باڵەکایەتی

گەشتی ئەمجارەی بەرنامەی (تام و چێژ)ـی تۆڕی میدیایی رووداو،  بۆ گوندی دۆڵانە لە سنووری قەزای چۆمان بوو. دۆڵانە گوندێکی بچووک و دڵڕفێنی دەڤەرەکەیە و بە سرووشتی جوان و کولتووری رەسەنی کوردەواری دەناسرێ.

ئەو گوندە لە 14 ماڵ پێکهاتووە و ژمارەی دانیشتووانەکەی نزیکەی 130 کەس دەبێت.

شادیە عەباس  و شلێر عەباس دوو خوشکی دانیشتووی گوندەکەن و بە خواردنێکی کوردەواری و خۆش، میوانداریی رووداویان کرد. ئەوان چۆنێتیی ئامادەکردنی خواردنی "قوڕاو"یان خستەڕوو.

پێداویستییەکانی خواردنی قوڕاو: ماست، گۆشتی سوور، پیاز، رۆن، جاترە، خوێ و ئاو.

‎شێوازی ئامادەکردن:
سەرەتا گۆشتەکە بە شێوەیەکی مامناوەند (نە زۆر ورد و نە زۆر گەورە) ورد دەکرێت و دەکوڵێنرێت، دواتریش کەمێک خوێی تێدەکرێت.

لە هەنگاوی دووەمدا، ماستەکە دەکرێتە دەفرێکی گەورە و بەگوێرەی پێویست ئاوی تێدەکرێت، دواتر بە باشی تێکدەدرێت تاوەکو ساف دەبێت و وەکو دۆی لێ دێت.

دواتریش پیازەکە ورد دەکەین، مەنجەڵێک دەخرێتە سەر ئاگر؛ رۆن و پیازە وردکراوەکەی تێدەکرێت، دوای ئەوەی پیازەکە سوور بووەوە، ماستە ئامادەکراوەکەی تێدەکرێت.

ئینجا دەبێت بەردەوام و بێ وەستان تێکی بدەین، تاوەکو دەکوڵێت بۆ ئەوەی ماستەکە تێکنەچێت.

دواتر گۆشتە کوڵاوەکەی تێدەکەین و دووبارە تێکی دەدەین. نزیکەی 10 خولەک پێش ئەوەی خواردنەکە بەتەواوی ئامادە بێت و لەسەر ئاگرەکە بهێندرێتە خوارەوە، جاترەکەی تێدەکەین و وازی لێ دەهێنین، تاوەکو دەکوڵێت و تامی خۆی دەدات.