بارسێلۆنا بەهۆی مۆندیالەوە شۆککرا

 

ئاستی تووڕەیی لە ناو یانەی بارسێلۆنادا بەرامبەر لویس دی لافۆینتێ، راهێنەری هەڵبژاردەی ئیسپانیا، روو لەزیادبوونە، چەند مانگێک پێش دەستپێکردنی مۆندیال. ئەمەش دوای ئەوەی ئاماژەکان بۆ ئەوە دەچن کە چەند یاریزانێکی یانە کەتەلۆنییەکە لە پلانەکانی هەڵبژاردەکەدا نەماون.

 

بەپێی ئەو راپۆرتانەی لەناو یانەکەدا باس دەکرێن، سێ یاریزانی بارسا پێیانوایە شایستەی ئەوەن لە لیستی هەڵبژاردەکەدا بن بۆ مۆندیالی 2026، بەڵام گەیشتوونەتە ئەو بڕوایەی کە هەلی بەشداریکردنیان لە مۆندیالدا زۆر لاوازە، مەگەر گۆڕانکارییەکی لەناکاو لە هەڵبژاردەکانی ستافی تەکنیکیدا رووبدات.

 

ئەم سێ یاریزانە بریتین لە: خوان گارسیا، ئێریک گارسیا و ئەلیخاندرۆ باڵدێ. ئەوان لە دیارترین یاریزانانی ئەم وەرزەی یانەکەن و ئاستێکی بەرزیان پێشکەش کردووە، ئەمەش وایکردووە دوورخستنەوەی ئەگەرییان ببێتە جێگەی پرسیار لە ناو یانەکەدا.

 

 

ئەم سێ یاریزانە هەست بە بێئومێدییەکی گەورە دەکەن، چونکە رۆڵێکی گرنگیان هەبووە لە ئەنجامەکانی بارسێلۆنا لەم وەرزەدا، بەڵام رێگای نوێنەرایەتیکردنی ئیسپانیا بەڕوویاندا بەداخراوی دەبینرێت. بابەتەکە پەیوەندی بەئاستی هونەرییانەوە نییە، بەڵکو پەیوەندی بەوەوە هەیە کە هەندێک کەس لە ناو یانەکەدا وەک 'سیاسەتێکی جێگیر'ـی راهێنەر دەیناسێنن، کە تەیا پشت بەچەند ناوێکی دیاریکراو دەبەستێت، ئەمەش هەلی هاتنە ناوەوەی یاریزانی نوێ کەمدەکاتەوە هەرچەندە ئاستیشیان بەرز بێت.

 

 

ئاماژەکان بۆ ئەوە دەچن کە لویس دی لافۆینتێ پێی باشە پشت بە گرووپێکی سەرەکی و جێگیر ببەستێت لە هەموو پۆستەکاندا، ئەمەش وایکردووە گۆڕانکارییەکان سنووردار بن تەنانەت ئەگەر ئاستی هەندێک یاریزانیش دابەزێت.

 

لە پۆستی گۆڵپارێزدا، خوان گارسیا گەشەسەندنێکی بەرچاوی بەخۆوە بینیوە و زۆرکەس بە یەکێک لە باشترین گۆڵپارێزەکانی خولەکە دایدەنێن، بەڵام ریزبەندیی گۆڵپارێزان لە هەڵبژاردەکەدا تاوەکو ئێستا وەک خۆی ماوەتەوە. ئێریک گارسیاش ئاستی بەرگری خۆی وەرگرتووەتەوە و بەجێگیری لەگەڵ بارسێلۆنا دەرکەوتووە، بەڵام رکابەرییەکی تووندی لەسەر پۆستەکەی هەیە. لە بەرامبەردا ئەلیخاندرۆ باڵدێ بەردەوامە لە پێشکەشکردنی رۆڵێکی باش و گەشەسەندنی تاکتیکی، بەڵام ئەمە رەنگی نەداوەتەوە لەسەر هەلەکانی لەگەڵ هەڵبژاردەی وڵاتەکەی.

 

 

لە ناو بارسێلۆنادا وا دەبینرێت کە ئاستی ئێستای یاریزانەکان فاکتەری یەکلاکەرەوە نییە بۆ بانگهێشتکردنیان بۆ هەڵبژاردە، بەڵکو وا دەردەکەوێت دی لافۆینتێ پێشینە دەدات بە بەردەوامبوونی پێکهاتەکە لەسەر حیسابی ئاستی هونەری.

 

ئەم دۆخە ناڕەزایی لە ناو یانەکەدا دروستکردووە، بەتایبەت لەگەڵ نزیکبوونەوەی مۆندیال، چونکە بەرپرسانی بارسێلۆنا پێیانوایە دوورخستنەوەی یاریزانانی خاوەن ئاستی بەرز بڕیارێکی نادادپەروەرانەیە. ئەگەر بارودۆخەکە بەمشێوەیە بەردەوام بێت، لەوانەیە خوان گارسیا، ئێریک گارسیا و ئەلیخاندرۆ باڵدێ خۆیان لە دەرەوەی لیستی ئیسپانیا بۆ مۆندیالی داهاتوو ببیننەوە، سەرەڕای درەوشانەوەیان لەگەڵ یانە کەتەلۆنییەکە لەم وەرزەدا.