رووداو دیجیتاڵ
لەو کاتەوەی کریستیانو رۆناڵدۆ، ئەستێرەی پۆرتوگالی لە سەرەتای ساڵی 2023ـوە پەیوەندی بە یانەی نەسڕی سعودییەوە کردووە، جیهان چاوی لەسەر ئەم گواستنەوە مێژووییە بووە، بەڵام ئەوەی ئێستا لە پشت پەردەی گۆڵە زۆرەکانی دۆنەوە دەگوزەرێت، زنجیرەیەک قەیران و بێ ئومێدییە کە بەرۆکی ئەو یاریزانە و یانەکەیشی گرتووە.
گرێکوێرەی نازناوەکان
گەورەترین قەیرانی رۆناڵدۆ لە سعودیە، نەبوونی نازناوی فەرمییە. سەرەڕای ئەوەی رۆناڵدۆ لەڕووی تاکەکەسییەوە ژمارەی پێوانەیی شکاندووە و وەک گۆڵکاری خولی سعودی دەستنیشانکرا، بەڵام تاوەکو ئێستا نەیتوانیوە نازناوی خولی سعودی، جامی شای سعودیە، یان خولی پاڵەوانەکانی ئاسیا بۆ نەسڕ بەدەستبهێنێت. تەنیا دەستکەوتی ئەو جامی یانە پاڵەوانەکانی عەرەب بوو کە پاڵەوانێتییەکی دۆستانەی نافەرمییە.
هیلال؛ مۆتەکەی رۆناڵدۆ
یانەی هیلال بووەتە گەورەترین بەربەست لەبەردەم رۆناڵدۆ. لە زۆربەی رووبەڕووبوونەوەکاندا نەسڕ بەرامبەر هیلال تووشی شکست بووە. ئەمەش وایکردووە رۆناڵدۆ لەناو یاریگەدا زۆرجار کۆنترۆڵی خۆی لەدەستبدات، بەتایبەت کاتێک هاندەرانی بەرامبەر بە هاواری "مێسی مێسی.." هێرشی دەروونی دەکەنە سەری.
کاردانەوە مشتومڕاوییەکان
رۆناڵدۆ لە چەندین بۆنەدا بەهۆی کاردانەوەکانی بەرامبەر هاندەران و ناوبژیوانان رووبەڕووی رەخنە بووەتەوە. چەندین جار سزادراوە و بۆ چەند یارییەک راگیراوە بەهۆی 'ئاماژەی نەشیاو' بۆ هاندەرانی تیپی بەرامبەر. ئەم رەفتارانە وەک نیشانەیەکن بۆ ئەو قوشارە دەروونییە گەورەیە دەبینرێن کە لەسەر شانیەتی.
گۆڕانکاریی بەردەوامی راهێنەران
یەکێکی دیکە لە قەیرانەکان، ناسەقامگیریی هونەرییە لە یانەی نەسڕ. لەو کاتەی رۆناڵدۆ بووەتە یاریزانی ئەو یانەیە، یانەکە چەندین راهێنەری وەک رودی گارسیا، لویس کاسترۆ و ستێفانۆ پیۆلی گۆڕیوە. دەگوترێت رۆناڵدۆ دەسەڵاتێکی زۆری لە بڕیارە کارگێڕییەکاندا هەیە و ئەمەش هەندێکجار دەبێتە هۆی دروستبوونی گرژی لە ژووری جلگۆڕیندا.
تەمەن و خەونی 1000 گۆڵ
رۆناڵدۆ ئێستا تەمەنی 41 ساڵە. قەیرانی گەورەی ئەوکاتە؛ ئایا جەستەی رێگەی پێدەدات بگاتە خەونی 1000 گۆڵ پێش ئەوەی واز لە یاریکردن بهێنێت؟ گرێبەستەکەی لە ساڵی 2027 کۆتایی دێت، بەڵام دەنگۆی ئەوەی دروستکردووە کە ڕەنگە ئەم وەرزە کۆتا وەرزی ئەو بێت لە سعوودیە.
کورتەی قەیرانەکە
کریستیانۆ رۆناڵدۆ لە سعودیە لەڕووی بازرگانی و میدیاییەوە سەرکەوتنی گەورەی بەدەستهێناوە، بەڵام لەڕووی وەرزشییەوە، گوشارەکان بۆ بردنەوەی نازناوێک لە لووتکەدان، چونکە بەبێ نازناو، مێژووەکەی لەگەڵ نەسڕ بە 'ناتەواو' دەمێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ