رووداو دیجیتاڵ
فلۆرێنتینۆ پێرێز، سەرۆکی یانەی ریال مەدرید پەیامێکی ئاگرین بۆ ئەلڤارۆ ئەربێلوای راهێنەری یانەکەی دەنێرێت و تەنیا یەک مەرج داهاتووی ئەو راهێنەرە لەگەڵ مێرێنگی دیاری دەکات.
ریال مەدرید بە ئامانجێکی روونەوە بەرەو قۆناخی یەکلاکەرەوەی وەرزەکە هەنگاو دەنێت، ئەویش بردنەوەی نازناوی چامپیۆنزلیگە. لە ناو جەرگەی ئەم ئاڵۆزییەدا ئەلڤارۆ ئەربێلوا وەستاوە، کە داهاتووی بەشێوەیەکی راستەوخۆ بەستراوەتەوە بە ئەنجامەکانی تیپەکە لەسەر ئاستی ئەورووپا.
گوشارێکی زۆر
دۆخی ناو ریال مەدرید وادەکات یانەکە بەزەیی بەکەسدا نەیێتەوە. لەو کاتەوەی لە کانوونی دووەمی 2026 و دوای رۆیشتنی چابی ئەلۆنسۆ ئەرکەکەی گرتووەتە دەست، ئەربێلوا رووبەڕووی چاوەڕوانییەکی زۆری هاندەران و فلۆرێنتینۆ پێرێزی سەرۆکی یانەکە بووەتەوە. ئێستا تەنیا ئاستی ناوخۆیی بەس نییە، گرنگترین شت ئەنجامەکانە لە چامپیۆنزلیگ، کە لەوێ هەر هەڵەیەک باجێکی زۆری هەیە و هەر بڕیارێکیش لەژێر چاودێرییەکی ورددایە.
چامپیۆنزلیگ.. کلیلی داهاتوو
سەرچاوەکانی نزیک لە یانەی شاهانە، ئاشکرایانکردووە کە سەرەڕای ئەوەی فلۆرێنتینۆ پێرێزی سەرۆک زۆر دڵخۆش بووە بەو کارەی ئەربێلوا بەرامبەر مانچێستەر سیتی کردووە لە هەردوو یارییەکەی چامپیۆنزیگدا، بەڵام بەئاشکرا ئەو پەیامەی بە راهێنەرە گەنجەکەی داوە کە بۆ ریال مەدرید، چامپیۆنزلیگ تەنیا پاڵەوانێتییەک نییە؛ بەڵکو پێوەری سەرکەوتنە.
وەک ئەو سەرچاوانە باسی دەکەن، ئەربێلوا دەزانێت داهاتووی لە یانەکەدا تەنیا بە یارییە ناوخۆییەکان ناپێورێت، بەڵکو بە کێبڕکێکردن لەسەر نازناوی ئەورووپا دیاری دەکرێت.
ئێستا تیپەکە گەیشتووەتە قۆناخە کۆتاییەکان و پشت بە ئەستێرەکانی وەک ڤینیسیۆس جۆنیۆر، ئێمباپێ و فێدی ڤاڵڤێردی دەبەستێت بۆ یەکلاکردنەوەی یارییە گەورەکان. لەم ساتانەدا، هەر بڕیارێکی تاکتیکی و هەر جوڵەیەک لەناو یاریگەدا، چارەنووسی ئەربێلوا بەشێوەیەکی راستەوخۆ دیاری دەکات.
ئەنجام یان گۆڕانکاری
پەیامی یانەکە روونە "ببەرەوە یان بڕۆ". سەرکەوتن لە چامپیۆنزلیگ گەرەنتییە بۆ بەردەوامبوونی ئەلڤارۆ ئەربێلوا و چەسپاندنی پێگەکەی لەسەر کورسیی یەدەگەکانی سانتیاگۆ بێرنابیۆ، بەڵام شکستهێنان لەوانەیە سەرەتایەک بێت بۆ پڕۆژەیەکی نوێی راهێنەرایەتی لەگەڵ راهێنەرێکی دیکەدا.
لە ریال مەدرید، گوشار بەشێکە لە ژیانی رۆژانە، بەڵام ئێستا هەموو شتێک ئاشکرایە؛ داهاتوو لەمەترسیدایە و چامپیۆنزلیگ بڕیاردەری کۆتاییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ