رووداو دیجیتاڵ
یارییەکانی گەڕی 16ـی خولی ئیتاڵیا دەستپێدەکەن و یاریی لووتکەی خولەکە لەنێوان هەردوو یانەی یوڤێنتوس و رۆما دەبێت، کاتێک لە تۆرینۆ رووبەڕووی یەکدەبنەوە.
ئەمڕۆ لە رکابەرییەکانی ئەم گەڕەی خولەکەدا، دوو یاریی بەڕێوەدەچن، لە یاریی لووتکەدا یوڤێنتوس لەنێو یاریگە و هاندەرانیدا میوانداریی یانەی رۆما دەکات بۆ رکابەریکردن لەسەر بردنەوەیەکی دیکە و کەمکردنەوەی جیاوازییەکەی لەگەڵ رۆما.
بەر لەم یارییە یوڤێنتوس لە پلەی پێنجەمی ریزبەندی خولەکەیە و چوار خاڵ لە رۆماوە دوورە، یانەکە دوایین دوو یاریی بردووەتەوە و لە دوایین 11 یارییدا تەنیا یەک دۆڕانی لەسەرجەم خول و پاڵەوانێتییەکاندا هەیە، تیپەکە دەیەوێت سوود لە یاریگە و هاندەرانی وەربگرێت بۆ ئەوەی بردنەوەیەکی دیکە تۆماربکات.
رۆما بەهەمان شێوە دوایین دوو یاریی بردووەتەوە و هیچ گۆڵێکیشی لێنەکراوە، دەیەوێت لە دەرەوەی یاریگەی خۆی ئەنجامێکی باش بەدەستبهێنێت، بۆ ئەوەی لە رکابەریکردنی ئینتەر، ناپۆلی و میلان لەسەر پێشەنگی ریزبەندی خولەکە بەردەوامبێت.
لوچیانۆ سپالێتی و کلاودیۆ رانیێری دوو راهێنەری نێوداری تۆپی پێی ئیتاڵیان و ئەمشەو رکابەریی یەکدی دەکەن بۆ ئەوەی سەرکردایەتیی تیپەکانیان بکەن بۆ مانەوە لە پلەکانی پێشەوەی ریزبەندی خولی ئیتاڵیدا.
ئەم یارییە کاژێر 22:45 لە یاریگەی ئالیانز لە تۆرینۆ بەڕێوەدەچێت، بەر لە یارییەکەش لازیۆ و کرێمۆنێسی رووبەڕووی یەکدەبنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ