جیهان
دۆناڵد ترەمپ و جۆ بایدن، بەربژێرانی کۆماری و دیموکراتەکان بۆ هەڵبژاردنی سەرۆکایەتیی ئەمریکا. وێنە: AFP
رووداو دیجیتاڵ
توانای جەستەیی دۆناڵد ترەمپ لە بانگەشەکانی هەڵبژاردن و بەتایبەتیش دوای تووشبوون و چاکبوونەوەی لە کۆرۆنا، بوونەتە جێگەی سەرنج. لە 24 کاژێردا سەرۆکی ئەمریکا سەردانی پێنج ویلایەتی یەکلاییکەرەوەی کردووە، لە هەر ویلایەتێک بۆ ماوەیەکی زۆر بە پێوە وەستاوە.
ترەمپ لە ئایۆوا، جۆرجیا، فلۆریدا، مشیگن و نۆرس کارۆلاینا پلان و بەرنامەکانی بانگەشەی هەڵبژاردنی بۆ لایەنگرانی خستەڕوو، هەندێک شتی نوێی درکاند، ئاماژەی بەوەش دا کە دوای هەڵبژاردن لەوانەیە ئەنتۆنی فاوچی لە کارەکەی دووربخاتەوە.
دۆناڵد ترەمپ، سەرۆکی ئەمریکا رایگەیاند "ڤاکسینێکی سەلامەتمان دەبێت کە ئەم ڤایرۆسە کۆتایی پێدێت. بەبێ ئەمە، ڤایرۆسەکە هەر دەسوڕێتەوە، ئەوانیش بەم هەواڵە شێت دەبن؛ چونکە هەر سەیری تەلەڤزیۆن دەکەی هەمووی هەواڵی کۆرۆنایە. ئێمەش دەمانەوێت لەسەر کۆرۆنا قسە بکەین، بەڵام بەدوای ئەویش شتی دیکە هەیە. لە 4ی نۆڤەمبەر بەو جۆرە گوێتان لە هەواڵی کۆرۆنا نابێت. بە کەس مەڵێن، بەڵام با چاوەڕێکەین تاوەکو دوای هەڵبژاردن، سوپاسی پێشنیازەکانتان دەکەم".
توانا جەستەییەکانی بایدن لاوازتر دەردەکەون بەرامبەر ترەمپ، لەوکاتەی ترەمپ لە پێنج ویلایەت بانگەشەی هەبوو، بایدن تەنیا لە پەنسلڤانیا قسەی بۆ خەڵک دەکرد، ئەوە بە لایەک کە زۆرجار باراک ئۆبامای، سەرۆکی پێشووی ئەمریکا بانگەشە بۆ بایدن دەکات، بەڵام سەرەڕای جیاوازی لە بانگەشەکان، بەگوێرەی دوایین راپرسی نیشتمانی، بایدن پێنج خاڵ لەپێش ترەمپەوەیە.
جۆ بایدن، بەربژێری دیموکراتەکان بۆ سەرۆکایەتیی ئەمریکا رایگەیاند "هەموو رۆژێک بۆ ئێمە بیرهێنانەوەیە کە شتی چەندە گرنگمان لەپێشە، لایەنی بەرامبەر چۆن هەوڵدەدات رێژەی بەشداری کەمبکاتەوە، بەتایبەتی لێرە لە فیلادلفیا. سەرۆک ترەمپ لەوەی لێرە روودەدات تۆقیوە. دەزانێت کە خەڵکی پەنسلڤانیا قسەی خۆیان دەبێت. دەزانێت ئەگەر ئێوە قسە بکەن دەرفەتێک بۆ ئەو ناهێڵنەوە".
بایدن بە سێ ساڵ تەمەنی لە ترەمپ گەورەترە، تەمەنی هەردووکیان لە سەرووی حەفتا ساڵەوەیە، ئەگەر بایدن دەرچێت دەبێتە بەتەمەنترین سەرۆک لە مێژووی ئەمریکا، بەڵام تاوەکو ئێستا ژمارە پێوانەییەکە لای ترەمپی 74 ساڵانە.
ئەمەش لەکاتێکدایە، چەند کاژێرێکی کەم ماوە بۆ دەستپێکردنی هەڵبژاردنەکانی ئەمریکا و بەپێی راپرسییەکان جۆ بایدن لەپێش ترەمپەوەیە، بەڵام لە هەڵبژاردنەکانی ساڵی 2016 هەرچەندە هیلاری کلینتن، بەربژێری دیموکراتەکان بۆ سەرۆکایەتیی ئەمریکا لە راپرسییەکان لەپێش ترەمپەوە بوو، کەچی ترەمپ هەڵبژاردنی بردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ