هەڵەیەک روویدا! دووبارە هەوڵبدە
رووداو دیجیتاڵ
نێردەی تایبەتیی بەریتانیا بۆ کاروباری سووریا بە تۆڕی میدیایی رووداوی راگەیاند، دۆخی سووریا لە قۆناخێکی "یەکلاکەرەوە و هەستیار"دایە. ئاشکراشی دەکات کە هەفتەی رابردوو لە دیمەشق بووە و لەگەڵ بەرپرسانی حکومەتی سووریا باسی لە پاراستنی مافی کورد کردووە.
ئان سنۆو، نێردەی تایبەتیی بەریتانیا بۆ کاروباری سووریا لە وەڵامی ئیمەیڵێکی نیاز مستەفا، ئیدیتۆر لە بەشی نێودەوڵەتیی رووداو رایگەیاند: "لە نزیکەوە چاودێریی دۆخی سووریا و رووداو و پێشێلکارییەکان دەکەین. پێشوازی لە رێککەوتنی ئاگربەستی ئەم دواییە دەکەن، بەڵام دۆخەکە هێشتا ناسکە و سووریا لەم کاتەدا پێویستی بە گفتوگۆ و ئاشتییە نەک تووندوتیژیی زیاتر."
نێردەی بەریتانیا ئاماژەی بەوە کرد، هەفتەی رابردوو بۆ گفتوگۆ سەردانی دیمەشقی کردووە و لەگەڵ حکومەتی سووریا کۆبووەتەوە.
سەبارەت بە نێوەڕۆکی کۆبوونەوەکانی لە دیمەشق، ئان سنۆو گوتی: "تەوەرێکی سەرەکیی گفتوگۆکانمان بریتی بوو لە گرنگیی حوکمڕانی بۆ هەموو سوورییەکان، لەوانەش دابینکردنی مافەکانی پێکهاتە کوردییەکان و بەشدارییە کاریگەرەکانیان لە کایەی سیاسی و کۆمەڵایەتیی سووریادا."
بە بڕوای نێردەکەی بەریتانیا، رێزگرتن لە ناسنامە جیاوازەکان و پەیڕەوکردنی حوکمڕانییەکی گشتگیر، کۆڵەکەی سەرەکین بۆ بەدیهێنانی سەقامگیری و دابینکردنی داهاتوویەکی ئارام بۆ هەموو پێکهاتەکانی سووریا.
ئان سنۆو داوا دەکات گفتوگۆی نێوان لایەنەکان، رێزگرتن لە ئاگربەست و پاراستنی خەڵکی سڤیل بکرێتە کاری لەپێشینە و دەڵێت: "لە نزیکەوە لەگەڵ هەموو لایەنەکان لە پەیوەندیدا دەبین و بەردەوام دەبین لە چاودێریکردنی وردی دۆخەکە."
لێدوانەکانی نێردەی بەریتانیا لەکاتێکدایە، لە 6ی ئەم مانگەوە هێزەکانی حکومەتی سووریا هێرشیان کردە سەر گەڕەکە کوردییەکانی حەلەب و ناوچەکانی ژێر دەسەڵاتی هەسەدە، دواتر هێرشیان کردە سەر رەققە و دێرەزوور و پارێزگای حەسەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ