قوتابخانەیەکی فێربوونی زمانی کوردی لە جنێف کرایەوە

 

فازڵ ڤالیان، مامۆستای زمانی کوردی لە خوێندگەکە میوانی بەرنامەی دیاسپۆرا بوو، رایگەیاند، ژمارەیەکی وردی لەسەر ژمارەی کوردی دانیشتووی کانتۆنی جنێف لەلا نییە، بەڵام بەپێی ئامارە نافەرمییەکان؛ زیاتر لە شەش هەزار کورد لە کانتۆنی جنێف دەژین، بە هەموو شێوەزارەکانییەوە. 

 

رێکخراوێکی کوردی لە جنێف هەیە و گرنگی بە زمان و کولتوور و فەرهەنگی کوردی دەدات. فازڵ ڤالیان لەوبارەیەوە گوتی، "ئێمە لە کانتۆنی جنێف هەستمان بەوەکرد کورد لێرە زۆر پەرتەوازەیە و بیرمان لەوە کردەوە چۆن کۆیان بکەینەوە و هەوڵی پارێزگاری لە زمان و کولتووری کوردی بکەین، ئەوەبوو بڕیارماندا بە دامەزراندنی کۆمەڵەی کوردی رۆژهەڵات -جنێف، هەروەها بیرمانکردەوە خوێندگەیەکی کوردی دابمەزرێنین، سەرەتا دەستمانکرد بە کردنەوەی خولی فێربوونی زمانی کوردی، پێشتر هەندێک وانەی کوردی بەشێوەی خول کرابوونەوە، بەڵام ئێمە لەگەڵ لایەنی پەیوەندیدار و بەشی خوێندنی کانتۆنەکە کۆبووینەوە و دواتر بڕیارماندا بە دامەزراندنی خوێندگەکە".

 

فازڵ ڤالیان گوتیشی، "کانتۆنی جنێف بڕیاریداوە لە هەر قوتابخانەیەک مامۆستای کوردی هەبێت زمانی کوردی بخوێندرێت، ئێستا خوێندن لە خوێندگەکەمان تەنیا بە شێوەزاری سۆرانییە و نزیکەی 20 قوتابی کورد لە تەمەنی چوار بۆ 16 ساڵ لە خوێندگەکەمان دەخوێنن، هەروەها هەندێک رێکخراوی دیکەش هەن هەوڵی کردنەوەی خوێندنگەی کوردی بە شێوەزاری کورمانجی دەدەن".

 

ئەمساڵ کردنەوەی قوتابخانە کوردییەکان لە وڵاتانی ئەوروپا پەرەیان سەندووە، واتە تەنیا لە ساڵی 2023دا قوتابخانەی کوردی لە چەندین شاری ئەڵمانیا و هۆڵەندا و سوێد کراونەتەوە و رێکخرا و کۆمەڵە کوردییەکان و مامۆستایان خۆبەخشانە وانە بە منداڵانی کورد دەڵێنەوە.