رووداو دیجیتاڵ
ئاژانسی کەشوهەوای ژاپۆن رایگەیاند، بوومەلەرزەیەک بە گوڕی 6.3 پلەی رێختەر هەرێمی ئیشیکاوای لە نێوەراستی ژاپۆن هەژاندووە.
رۆژی هەینی، 5ـی ئایاری 2023، ئاژانسی بوومەلەرزەزانیی ژاپۆن رایگەیاند، بوومەلەرزەکە کاژێر 2:42 بەیانیی رۆژی هەینی بە کاتی نێوخۆی ژاپۆن [کاژێر 8:42 خولەکی بەیانی بە کاتی هەرێمی کوردستان] روویداوە.
ئاژانسی بوومەلەرزەزانی ژاپۆن رایگەیاند: "قووڵایی بوومەلەرزەکە 6 کیلۆمەتر بووە و چاوەڕێی روودانی تسونامی لێناکرێت."
دەزگای بوومەلەرزەزانیی ئەمریکا، گوڕی بوومەلەرزەکەی بە 6.2 پلەی رێختەر دیاریکردووە.
بەهۆی بوومەلەرزەکەوە، هێڵی گواستنەوەی شەمەندەفەری نێوان شارەکان وەستاون و خەڵکی لە ماڵەکانیان هاتوونەتە دەرەوە.
ساڵی 2007 لە هەمان ناوچەی ژاپۆن بوومەلەرزەیەک بەگوڕی 6.9 پلەی رێختەر روویدا و سەتان هاووڵاتی گیانیان لەدەستدا و زیاتر لە 200 خانووش رووخان.
ژاپۆن زوو زوو رووبەڕووی بوومەلەرزە و تەقینەوەی گڕکانی دەبێتەوە. ئەمەش بۆ ئەوە دەگەڕێتەوە کە وڵاتەکە دەکەوێتە سەر "ئەڵقەی ئاگر"ـی دەریای هێمن، کە پشتێنەیەکی تووندی چالاکی بوومەلەرزە و تەقینەوەی گڕکانە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ