کۆچبەرە کوردە ئێزدییەکان
رووداو هەولێر
43 کۆچبەری کورد، کە سەرجەمیان ئێزدین، زیاتر لە هەفتەیەکە لە سنووری یۆنان لە دارستانێکدا گیریان خواردووە و داوای هاوکاریی بەپەلە دەکەن، وەکو خۆیان باسی دەکەن، نان، ئاو و شیری منداڵیان پێنەماوە، هەندێکیشیان نەخۆشن.
ئەو کۆچبەرانە ماوەی نۆ رۆژە لە گوندی ماریتسا لە دوورگەی رۆتسی یۆنان گیریان خواردووە و ژن و منداڵی نەخۆشیان تێدایە. سدیق مەڕوان، یەکێکە لە پەنابەرەکان و بە تۆڕی میدیایی رووداوی گوت، جگە لە خواردن و پێداویستی، پارەشیان پێ نەماوە.
لە ڤیدیۆیەکدا کە کۆچبەرەکان بۆ رووداویان ناردووە، منداڵێکی نەخۆش دەردەکەوێت، کۆچبەرەکان دەڵێن هیچیان پێ نەماوە بیخۆن. هەروەها ژنێک دەردەکەوێت کە دووگیانە و دەڵێن دوو رۆژە نانی نەخواردووە؛ ژنێکی دیکە دەڵێت، نەخۆشیی شەکرەی هەیە و دەرمانی پێنەماوە.
هەر لەو ڤیدیۆیەدا ژنێکی دیکە، منداڵێکی لە باوەشدایە و دەڵێت، شیری منداڵ، نان و ئاویشیان پێنەماوە و دۆخمان خراپە.
لە دوای شەڕی داعشەوە زیاتر لە 120 هەزار کوردی ئێزدی زێدی خۆیان بۆ وڵاتانی ئەوروپا جێهێشتووە؛ هەروەها زیاتر لە 300 هەزاریان هێشتا لە کامپەکانی هەرێمی کوردستاندا دەژین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ