رووداو دیجیتاڵ
کۆمپانیای مێتا رایگەیاند، لەگەڵ دەزگا میدیاییە گەورەکان رێککەوتووە کە بابەتەکانیان لەگەڵ بەرنامەی ژیریی دەستکردەکەی تێکەڵ بکات، بۆئەوەی زانیاریی سات بە سات بە بەکارهێنەرانی فەیسبووک، ئینستاگرام و وەتسئەپ بدات.
ئەو کۆمپانیا زەبەلاحەی تۆڕە کۆمەڵایەتییەکان ئاشکرای کرد، کاتێک بەکارهێنەران پرسیاری پەیوەندیدار بە هەواڵ دەکەن، مێتا ئەی ئای (Meta AI) هەواڵی بەپەلە و بابەتی جۆراوجۆری دیکە بە بەکارهێنەران دەدات، ئەوەش لە رێگەی هاوبەشی لەگەڵ تۆڕە هەواڵی و میدیاییە گەورەکان.
مێتا لە بڵاوکراوەیەکدا ئاماژەی بەوە کردووە، ئەم تایبەتمەندییە رێگە بە بەکارهێنەران دەدات دەستیان بە "سەرچاوەی نێوەڕۆکی فرەچەشنتر" بگات و لینکی ماڵپەڕی هاوبەشەکان وەربگرن بۆ خوێندنەوەی وردەکاریی زیاتری بابەتەکان.
مێتا دەڵێ، ئامانج لەم فراوانکردنە ئەوەیە بەرنامەی ژیریی دەستکردەکەی لە دابینکردنی نوێترین هەواڵ خێراتر و فرەسەرچاوەتر بێت، هاوکات دانی بەوەدا نا کە "شوێنکەوتنی رووداوەکان بەشێوەی راستەوخۆ رەنگە بۆ سیستمەکانی ئێستای ژیریی دەستکرد ئاسان نەبێت".
کۆمپانیاکە رایگەیاندووە، پلانی هەیە بەردەوام بێت لە زیادکردنی هاوبەشی نوێ و پەرەپێدانی تایبەتمەندیی نوێ، ئەمەش لە کاتێکدایە کێبڕکێ لەنێوان کۆمپانیاکانی تەکنەلۆجیا بۆ بەهێزکردنی تواناکانی ژیریی دەستکرد چڕبووەتەوە.
خزمەتگوزاریی مێتا ئەی ئای لە تەواوی پلاتفۆرمەکانی کۆمپانیاکە بەردەستە و خزمەت بە ملیاران بەکارهێنەر دەکات.
ئەم هەنگاوە لە کاتێکدایە، کۆمپانیاکانی بواری ژیریی دەستکرد، لەوانەش چات جی پی تی (ChatGPT) و جێمینای (Gemini)ـی سەر بە گووگڵ، هەوڵی زۆر دەدەن بابەتە راستەوخۆکانی سەر ئینتەرنێت و هەواڵەکان تێکەڵ بە بەرنامەکانیان بکەن.
بە درێژایی ساڵانی رابردوو، پەیوەندیی مێتا و دەزگاکانی راگەیاندن هەڵبەز و دابەزی زۆری بەخۆیەوە بینیوە.
ئەو کۆمپانیایەی مارک زوکەربێرگ لە ساڵی 2004 دایمەزراند، پێشتر رایگەیاندبوو هەواڵ بەشێکی زۆر کەم لە کارلێکی بەکارهێنەران لەسەر پلاتفۆرمەکانی پێکدەهێنێت، بۆیە دەستی بە داخستنی "تابی هەواڵ - Facebook News" کرد لە بازاڕەکانی وەک ئەمریکا، بەریتانیا و فەرەنسا. ئەمەش بووە هۆی کۆتاییهاتنی گرێبەستە ملیۆن دۆلارییەکان لەگەڵ دەزگا هەواڵییە پێشەنگەکان.
هەروەها زوکەربێرگ لە کانوونی دووەمی ئەم ساڵدا بڕیارێکی چاوەڕواننەکراوی دا بۆ راگرتنی پڕۆگرامی پشکنینی راستییەکان لە ئەمریکا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ