هەڵەیەک روویدا! دووبارە هەوڵبدە
جیهان
ڤلادیمیر پووتین، سەرۆکی رووسیا و شی جینپینگ، سەرۆکی چین. وێنەکە ساڵی 2022ە: Alexei Druzhinin/AFP
رووداو دیجیتاڵ
ڤلادیمیر پووتین، سەرۆکی رووسیا لەسەر بانگهێشتی فەرمیی شی جینپینگ، سەرۆکی چین دەگاتە بەیژینگ. کرێملن رایدەگەیێنێت، هەردوو سەرۆک لە کۆبوونەوەیەکی لووتکەدا، هاوبەشیی ستراتیژیی نێوانیان و پرسە گەرمەکانی جیهان، لە سەرووی هەمووشیانەوە شەڕی ئۆکراینا، تاوتوێ دەکەن.
بەگوێرەی راگەیێندراوێکی کۆشکی کرێملن، سەردانەکەی پووتین لە رۆژانی 19 و 20ی ئایار دەبێت. ئەم سەردانە لە کاتێکدایە کە 25 ساڵ بەسەر واژۆکردنی "پەیماننامەی دراوسێیەتی باش و هاوکاریی دۆستانە" تێدەپەڕێت، کە لە ساڵی 2001ـەوە بووەتە بەردی بناخەی پەیوەندییەکانی مۆسکۆ و بەیژینگ.
دیمیتری پێسکۆڤ، گوتەبێژی کرێملن دەربارەی کارنامەی سەردانەکە دەڵێت، "لە سەرووی هەموو شتێکەوە، باسی پەیوەندییە دووقۆڵییەکان دەکەین کە هاوبەشییەکی ستراتیژیی تایبەتە. هەروەها قەبارەی بازرگانی نێوانمان کە بەردەوام لە گەشەدایە و 200 ملیار دۆلاری تێپەڕاندووە، تەوەرێکی سەرەکی دەبێت."
بڕیارە لەو کۆبوونەوەیەدا باس لە چەندین پرسی هەستیار بکرێت، لەوانە: هاوکارییەکانی بواری وزە، شەڕی ئۆکراینا، پەیوەندییەکان لەگەڵ ئەمریکا، پرسی تایوان و گرژییەکانی رۆژهەڵاتی ناوەڕاست.
سەردانەکەی پووتین تەنیا چەند رۆژێک دوای سەردانی دۆناڵد ترەمپ، سەرۆکی ئەمریکا بۆ چین دێت. شرۆڤەکاران پێیانوایە پووتین دەیەوێت لە رێگەی ئەم سەردانەوە ئەوە نیشان بدات کە مۆسکۆ و بەیژینگ لە بەرەیەکی یەکگرتوودان و هاوپەیمانییەکەیان لە بەرامبەر گوشارە نێودەوڵەتییەکاندا "بەهێزە."
لە پەراوێزی سەردانەکەدا، هەردوو سەرۆک بەشداری لە رێوڕەسمی دەستپێکردنی "ساڵانی پەروەردەی رووسیا و چین" بۆ ساڵانی 2026-2027 دەکەن و چاوەڕوان دەکرێت چەندین رێککەوتنامەی نوێ لە بوارەکانی ئابووری و فێرکردن واژۆ بکەن.
چین؛ شادەماری ئابووریی رووسیا
لەدوای دەستپێکردنی شەڕی ئۆکراینا و سەپاندنی سزاکانی رۆژئاوا، چین بووەتە گەورەترین هاوبەشی ئابووریی مۆسکۆ. چین بڕێکی زۆر لە نەوت و گازی رووسیا دەکڕێت و مۆسکۆش بۆ دابینکردنی پێداویستییە تەکنەلۆژی و پیشەسازییەکانی، پشتی بە بەیژینگ بەستووە.
ئەمە یەکەمجارە چین لە یەک مانگدا میوانداریی هەردوو سەرۆکی رووسیا و ئەمریکا دەکات، ئەمەش ئاماژەیە بۆ رۆڵی ناوەندیی بەیژینگ لە دیپلۆماسیی جیهانیدا.
لەوەتەی هەردوو سەرۆک دەسەڵاتیان گرتووەتە دەست، تاوەکو ئێستا زیاتر لە 40 جار کۆبوونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ