نوێنەری چین لە یوئێن لەبارەی زمانی کوردی بۆ رووداو: دەبێت سووریا بە وریاییەوە مامەڵەی لەگەڵ بکات

 

 

ئەم مانگە چین سەرۆکایەتیی ئەنجوومەنی ئاسایشی نەتەوە یەکگرتووەکان دەکات و رۆژی هەینی ئەنجوومەنەکە کۆبوونەوەیەکی سەبارەت بە سووریا کرد. 

 

دوای کۆبوونەوەکە، فو کۆنگ لە هەڤپەیڤینێکی تایبەتدا لەگەڵ رووداو ئاماژەی بەوە کرد، ئەم کۆبوونەوەیە پێداچوونەوەیەکی ئاسایی مانگانە بوو بۆ دۆخی ئەو وڵاتە. نوێنەری چین گوتی: "وڵاتانی ئەندام هێشتا زۆر نیگەرانن لەبارەی دۆخی سووریا، بەتایبەت لە رووی دیالۆگی گشتگیر و پرۆسەی سیاسیی ناوخۆیی."

 

فو کۆنگ جەختی لە پرسی ئاسایش کردەوە و گوتی: "وەک هەمیشە گوتوومانە، سووریا نابێت ببێتە شوێنێک کە ببێتە هەڕەشە بۆ سەر وڵاتانی دیکە. هیوادارین حکومەتی سووریا ئەو بەڵێنانەی کە پەیوەستن بە بەرەنگاربوونەوەی تیرۆر جێبەجێیان بکات."

 

پرسی زمانی کوردی و خۆپێشاندانەکان

 لە وەڵامی پرسیارێکی دیکەی رووداودا سەبارەت بەو ناڕەزایەتییانەی بەم دواییە لە پارێزگای حەسەکەی رۆژئاوای کوردستان دژی لابردنی زمانی کوردی لەسەر تابلۆ حکومییەکان بەڕێوەچوون، نوێنەری چین داوای لە حکومەتی دیمەشق کرد کە بە وریاییەوە لەم مژارە بڕوانێت.

 

فو کۆنگ رایگەیاند: "ئێمە داوای دیالۆگێکی گشتگیر دەکەین کە تێیدا رەچاوی ئەوە بکرێت هەر وڵاتێک دۆخی جیاوازی خۆی هەیە؛" ئاماژەی بەوەش کرد کە دەبێت بە وریاییەکی زۆرەوە مامەڵە لەگەڵ ئەم پرسەدا بکرێت و گوتیشی: "هیوادارین چارەسەرێک بدۆزرێتەوە کە بۆ هەموو لایەک و هەموو پێکهاتەکانی سووریا پەسند بێت."

 

 

 

فو کۆنگ: باشە، ئەمە پێداچوونەوەیەکی ئاسایی مانگانەیە بە دۆخی سووریادا، چونکە دەبینین وڵاتانی ئەندام هێشتا زۆر نیگەرانن لەبارەی دۆخی سووریا، بە تایبەت لە رووی دیالۆگی گشتگیر، گفتوگۆی سیاسی و پرۆسەی نێوخۆیی و هەروەها پرسی بەرەنگاربوونەوەی تیرۆر. هیوادارین حکومەتی سووریا بایەخ بە داواکارییەکانی وڵاتان بدات. وەک نوێنەری چین، دەمەوێ جەخت لە گرنگیی تایبەتی پرسی تیرۆر لەنێو سووریا بکەمەوە، وەک هەمیشە گوتوومانە، سووریا نابێت ببێتە شوێنێک کە ببێتە هەڕەشە بۆ سەر وڵاتانی دیکە. هیوادارین حکومەتی سووریا ئەو بەڵێنانەی کە پەیوەستن بە بەرەنگاربوونەوەی تیرۆر جێبەجێ بکات.

 

 

فو کۆنگ: وەک گوتم، ئێمە داوای دیالۆگێکی گشتگیر دەکەین کە تێیدا رەچاوی ئەوە بکرێ کە هەر وڵاتێک دۆخی جیاوازی خۆی هەیە. بۆیە پێموایە دەبێت بە وریاییەوە مامەڵە لەگەڵ ئەم پرسەدا بکرێ و هیوادارین چارەسەرێک بدۆزرێتەوە کە بۆ هەموو لایەک و هەموو خەڵکی ئەوێ پەسند بێت.