چەند منداڵێکی پەنابەری ئۆکراینی لە رۆمانیا. وێنە: Daniel MIHAILESCU / AFP
رووداو - هەولێر
نەتەوەیەکگرتووەکان پێداویستییەکانی خوێندنی بۆ منداڵە ئۆکراینییەکان دابینکردووە. کۆمەکبەخشە نێوخۆیی و دەرەکییەکانیش مووچەی ستافی قوتابخانەکە دەدەن. بە گوێرەی دوایین ئاماری نەتەوە یەکگرتووەکان، 2 ملیۆن و 800 هەزار منداڵ لە نێو ئۆکراینا ئاوارە بوون، 2 ملیۆن منداڵی دیکەی ئۆکراینی بوونەتە پەنابەر؛ واتا 64%ی منداڵانی ئۆکراینا ماڵەکانیان جێهێشتووە.
لە شاری بوخاریستی پایتەختی رۆمانیا قوتابخانەیەک هەیە کە رۆژانە لە کاژێر 3ی دوای نیوەڕۆ تاوەکو 6ی ئێوارە، دەبێتە قوتابخانەی سەرەتایی بۆ منداڵانی هەڵاتووی ئۆکراینا.
لەو قوتابخانەیەدا 227 منداڵی ئۆکراینی تەمەن 4 بۆ 7 ساڵ دەخوێنن و 600 قوتابیی دیکە چاوەڕێی وەرگرتنن.
ئەنستەیژیا ماوەی سێ هەفتەیە ئۆکراینای جێهێشتووە. مانگێک لەمەوبەر، بەڕێوەبەری قوتابخانەیەکی سەرەتایی بوو لە شاری ئۆدێسا و ئێستاش سەرپەرشتی خوێندنی منداڵە ئۆکراینییەکان لەو قوتابخانەیەی رۆمانیا دەکات.
ئەنستەیژیا کۆنۆڤالۆڤا، مامۆستا دەڵێت، "ئێستا پۆلەکانمان زۆر قەرەباڵخن. لە قوتابخانەکەدا هەشت پۆلمان هەیە. هەریەکەیان 32 تاوەکو 42 قوتابی تێدایە".
ماکسیم، باوکی قوتابییەکە و دەڵێت، "بۆ ئەوان، ئەمە بەشێکە لە ئاساییبوونەوەی ژیان. هەندێکیان دەڵێن ژیانمان ئاسایی بووەتەوە. منداڵەکان پەیوەندیی نوێیان دروستکردووە و شتێکی باشە بۆیان".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ