Hewlêr (Rûdaw) - Petrola brent a Deryaya Bakur îro biha bû.
Çîn û Amerîkayê li ser pêşnûmeyekê li hev kir ku piştî pesendkirina ji aliyê serokên her du welatan ve, dikare ji bo rêkeftineke berfireh a bazirganiyê di navbera wan de bibe nexşerêyek.
Ev yek îro di roja yekem a vebûna bazarên cîhanê de bû sedema bilindbûna bihayê petrolê.
Bihayê petrola brent a Deryaya Bakur 46 sentan bilind bû û bermîlek bi 66 dolar û 40 sentî hat firotin.
Bihayê petrola sivik a Teksasê ya Amerîkayê jî bi heman rêjeyê bilind bû û bermîlek bi 61 dolar û 96 sentan hat firotin.
Îhtimala rêkeftineke dawî ya di navbera Çîn û Amerîkayê de ew dilgiraniyên ku dibêjin têkçûna pêwendiyan dê bibe sedema sistbûna aboriya cîhanê û kêmbûna daxwaza ji bo petrolê kêm kirine.
Wezîrê Xezîneyê yê Amerîkayê Scott Bessent doh ragihand ku li ser çarçoveyekê rêkeftin çêbûye ku dikare bibe sedema rêkeftineke nû, berfireh û mayînde ya bi Çînê re.
Donald Trump jî heman rojê derbarê rêkeftina bi Çînê re ya li ser pirsgirêkên bazirganiyê geşbîniya xwe anîbû ziman.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse